इनरुवा । सुनसरीका प्रमुख जिल्ला अधिकारी फणिन्द्रमणि पोखरेलको सरुवा भएपछि जिल्लाका स्थानीय तहसँगै अन्य सरोकारवालहरुले बिहीबार छुट्टाछुट्टै कार्यक्रमबीच उनको बिदाई गरेका छन् ।
अचानक समय अवधिअगावै सरुवामा परेका पोखरेलको बिदाई गर्न जिल्ला प्रशासन कार्यालय सुनसरीले आह्वान गरेको निमन्त्रणाअनुसार बिहीबार इनरुवाका विभिन्न स्थानमा उनको बिदाईका निम्ति कार्यक्रमहरु आयोजना भएका हुन् ।
बिहीबार जिल्ला प्रशासन कार्यालय सुनसरीमा नेपाल पत्रकार महासंघ १ नम्बर प्रदेश समितिका सदस्य एवं प्रतिक्षण दैनिका प्रकाशक/सम्पादक इकवाल अहमद सहितको टोलीले उनको बिदाई गर्दै अगामी कार्यकाल सफलताको कामना व्यक्त गरेका थिए ।
सो अवसरमा नेपाल पत्रकार महासंघ सुनसरी शाखाका अध्यक्ष अमर खड्का, पत्रकार राजेन्द्र पोखरेल, अमर काफ्लेलगायतको उपस्थिति रहेको थियो ।
त्यससँगै जिल्ला समन्वय समिति सुनसरीसहित १२ वटा स्थानीय तहका प्रमुख, उपप्रमुख, अध्यक्ष, उपाध्यक्षहरुको तर्फबाट प्रजिअ पोखरेलको बिदाई गरिएको हो ।
प्रजिअ पोखरेलले जिल्लामा समन्वयकारी भूमिका निर्वाह गरेर योगदान गरेको र जनप्रतिनिधिसँग मैत्रीपूर्ण व्यवहार तथा सौहार्द वातावरणमा जिल्लाको शान्ति सुरक्षा सञ्चालन गरेको भन्दै फूलमाला, अबिर र दोसल्ला ओढाई अगामी कार्यकाल सफलताको शुभकामनासहित जनप्रतिनिधिहरुले बिदाई गरेका हुन् ।
बिदाई समारोह कार्यक्रममा जिल्ला समन्वय समिति सुनसरीका प्रमुख गोपाल राजभण्डारीले प्रजिअ पोखरेलको स्थानीय तहसँग रहेको समन्वयकारी भूमिका प्रशंसायोग्य रहेको बताए । उनले सफल र असल प्रशासकको रुपमा प्रजिअ पोखरेलले गरेको कामको सदैव आफूहरुले मूल्याङ्कन गर्ने बताए ।
