इनरुवा। ‘स्वास्थ्य समृद्धि र सुरक्षा कोभिड १९ खोपले गर्छ रक्षा’ भन्ने मुल नाराका साथ कोरोनाविरुद्धको खोप अभियान सुनसरीमा सञ्चालनको तयारी पूरा भएको जिल्ला स्वास्थ्य कार्यालय सुनसरीले जनाएको छ ।
स्वास्थ्य कार्यालय सुनसरीले जिल्लाका ५५ वर्षमाथि उमेर समूहका व्यक्तिहरुलाई लगाउने कोरोनाविरुद्धको खोप लगाउने तयारी पूरा गरेको जनाएको छ । बिहीबार स्वास्थ्य कार्यालयमा कोभिड १९ विरुद्धको खोप अभियान सम्बन्धमा मिडियाकर्मीसँगको अभिमुखीकरण कार्यक्रममा दिएको जानकारीअनुसार जिल्लाका १२ स्थानीय तहको ८२ खोप केन्द्र र २३९ सेसनमार्फत कोरोनाविरुद्धको खोप लगाउने तयारी पूरा भएको जनाएको छ ।
जिल्लामा सबै स्थानीय तहको एक सय २४ वटै वडालाई लक्षित गरेर खोप अभियानको तयारी पूरा गरेको जानकारी दिएको छ । खोप अभियानअन्र्तगत खटिने स्वंयसेवक, स्वास्थ्यकर्मी र चिकित्सक समेतलाई अभिमुखीकरण तालिम र प्रशिक्षण दिई तयारी पूरा गरेको स्वास्थ्य कार्यालय सुनसरीले जनाएको हो ।
स्वास्थ्य कार्यालय सुनसरीका प्रमुख सागर प्रसाईका अनुसार जिल्लाका एक लाख आठ हजार ३५० जना ५५ वर्ष माथि उमेर समूह, सवारीचालक, सहचालक, प्राधिकरणमा काम गर्ने कर्मचारीसहितलाई खोप लगाउने तयारी भएको छ ।
फागुन २३ गतेदेखि २७ गतेसम्म सञ्चालन गर्ने खोप अभियानका लागि १२ जना चिकित्सकसहित ७१७ जना स्वास्थ्यकर्मी परिचालन गर्ने तयारी गरेको स्वास्थ्य कार्यालय सुनसरीका प्रमुख प्रसाईले जानकारी दिएका छन् ।
प्रत्येक खोप केन्द्रमा बढीमा तीन जनासम्म परिचालन हुने कार्यालय प्रमुख प्रसाईले बताए । अभिमुखीकरण कार्यक्रममा डा। सुशील प्याकुरेल, जनस्वास्थ्य निरीक्षक सिर्जना लिंथेप, दीक्षा श्रेष्ठलगायत विभिन्न सञ्चार संस्थाका प्रतिनिधिहरुले बोलेका थिए ।
वक्ताहरुले अभियानलाई सफल पार्न सबै सरोकारवाला निकायको समन्वय आवश्यक रहेको बताएका थिए । खोपको प्रभावकारिता र विश्वसनियता रहेकाले नआत्तिई सबै लक्षित समुहलाई लगाउनका लागि अपिल गरेका थिए । पहिलो चरणमा खोपको प्रभावकारिता शतप्रतिशत देखिएकाले शंका–उपशंका नगरी चिकित्सक र खोपकर्ताको परामर्शमा खोप लगाउनसमेत आग्रह गरेका थिए ।
यसैबीच जिल्लाको १२ वटा स्थानीय तहमा सञ्चालन गरिने खोप केन्द्र र सेसनको विवरणसमेत सार्वजनिक गरेको छ । सार्वजनिक गरिएको विवरणअनुसार धरान उपमहानगरपालिकामा ६ वटा खोप केन्द्र र २६ वटा खोप सेसन रहने व्यवस्था गरिएको छ भने त्यसमा २६ जना खोपकार्यकर्ता, ७८ जना स्वंयसेवक र पाँच जना अन्य स्वास्थ्यकर्मी रहने व्यवस्था मिलाइएको छ ।
त्यस्तै इनरुवामा सातवटा खोप केन्द्र,२१ वटा खोप सेसन, २१ जना खोप कार्यकर्ता, ६३ जना स्वंयसेवक र सात जना अन्य स्वास्थ्यकर्मी परिचालन गरिँदै छ । त्यसैगरी कोसी गाउँपालिकामा आठवटा खोपकेन्द्र, २० वटा सेसन, २० जना खोप कार्यकर्ता, ६० जना स्वंयसेवक र ६ जना अन्य स्वास्थ्यकर्मी परिचालन गर्ने तयारी गरेको छ ।
उता हरिनगर गाउँपालिकाका लागि पाँचवटा खोपकेन्द्र निर्धारण गरिएको छ भने १९ वटा खोप सेसन, १९ जना खोप कार्याकर्ता, ५७ जना स्वंयसेवक र सात जना अन्य स्वास्थ्यकर्मी परिचालन गर्ने तयारी गरेको छ ।
