इनरुवा । स्थानीय तहलाई आधुनिक र प्रविधिमैत्री बनाउने सरकारको नीति अनुसार सुनसरीको हरिनगर गाउँपालिकाले आफनो पञ्जिकरण व्यवस्थालाई प्रविधिमैत्री बनाउने प्रयास थालेको छ ।
गाउँपालिकाले प्रयास स्वरुप सामाजिक सुरक्षा तथा घटना दर्ता सुदृढिकरण आयोजना अन्र्तगत प्रत्येक वडामा उपकरण सहित दर्ता शिविर अभिमुखिकरण कार्यक्रम सुरु गरिएको छ ।
गाउँपालिकामा पञ्जिकरणको कार्यलाई व्यवस्थित र मर्यादित बनाउनका लागि प्रविधिमैत्री कम्प्यूटर, प्रिन्टर, स्कयानर र फोरजी वाइरलेस डोगोल वितरण समेत गरिएको छ । हरिनगर गाउँपालिकाले सातवटै वडालाई एक दिने अभिमुखिकरण गर्दै उपकरण हस्तान्तरण गरेको जनाएको छ ।
हरिनगर गाउँपालिकाको राष्ट्रिय परिचय पत्र तथा पञ्जिकरण विभाग सेवा इकाई मार्फत प्रविधिमैत्री कार्य प्रारम्भ भएको हो । शिविर संचालन प्रत्येक वडामा गर्ने गरी उपकरण हस्तान्तरण गरिएको प्रमुख प्रशाकीय अधिकृृत भक्त बहादुर खड्काले बताए । खड्काले वडाका कामहरु प्रविधिमैत्री र अनलाइन मैत्री समेत गर्ने गरी वडाहरुलाई उपकरण हस्तान्तरण गरिएको जनाए ।
गाउँपालिकामा समयमा पञ्जिकरण नगराएका र गर्न छुटेका लाभग्राहीहरुलाई सहजताको लागि वडा वडामै निःशुल्क दर्ता शिविर संचालन गरी सेवा दिने तयारी स्वरुप अभिमुखिकरण र उपकरण वितरण गरेको पालिकाका अध्यक्ष गफार अन्सारी मियाँले बताए ।
उनले पञ्जिकरण नभएकै कारण् बालबालिकाहरुको हकमा विधालय भर्नामा समस्या, विवाह दर्ता नहुदाँ नाता सम्वन्ध कायम गर्न, मृत्यु दर्ता नहुदाँ अंशवण्डा, सामाजिक सुरक्षा भत्ता लगायतका सुविधाबाट वञ्चित हुँदै आएको नागरिकलाई दर्ता शिविरले योगदान गर्ने बताए । उनले सरकारी सेवा सुविधा पाउनका लागि पञ्जिकरण महत्वपूर्ण विषय भएकाले त्यसलाई अभियानकै रुपमा संचालन गर्न निःशुल्क दर्ता शिविर अभियान ल्याएको जनाए ।
कार्यक्रममा गाउँपालिकाका अध्यक्ष गफार अन्सारी मियाँ, उपाध्यक्ष रिमझिम कुमारी भगत, कार्यपालिका सदस्य सुशिल कुमार ठाकुर, शिक्षा शाखाका अजित कुमार मल्लिक सहितको सरोकारवालाको उपस्थिती रहेको थियो । कार्यक्रममा सबै वडाका जनप्रतिनिधि तथा वडा सचिवहरुको सहभागिता रहेको थियोे ।
