इनरुवा । सुनसरीको भोक्राहा नरसिंह गाउँपालिकाको चालु आर्थिक वर्षको मध्यवर्ती समीक्षासहित नवौँ गाउँसभा शनिबार सम्पन्न भएको छ । गाउँपालिकाले आर्थिक वर्ष २०७७/०७८ को साउनदेखि फागुन २१ गतेसम्मको आयव्याय विवरण र बजेट नीति तथा कार्यक्रम प्रस्तुत गर्दै गाउँसभा सम्पन्न गरेको हो ।
गाउँपालिकालाई प्राप्त भएको संघीय तथा प्रदेश बजेटको आकार र हालसम्म गरेको खर्च विवरणसहित समीक्षा गरेर शनिबार गाउँसभा सम्पन्न गरेको भोक्राहा नरसिंह गाउँपालिकाकी उपाध्यक्ष पुनमकुमारी मेहताले बताइन् ।
चालु आर्थिक वर्षको कुल ४५ करोड ९५ लाख ९८ हजार ५ सय ५५ रुपैयाँ अख्तियारी प्रदान गरेकोेमा गाउँपालिकाको सञ्चित कोषमा नेपाल सरकारको बित्तीय समान्यीकरणको रुपमा १२ करोड ९४ लाख रहेकोमा तेश्रो चौमासिक सम्म ९ करोड ५५ लाख ५० हजार मात्रै प्राप्त भएको जनाएको छ भने बाँकी ३ करोड १८ लाख ५० हजार रुपैयाँ प्राप्त हुन् बाँकी रहेको गाउँसभामा पेस गरिएको प्रतिवेदनमा उल्लेख गरिएको छ ।
चालु आर्थिक वर्षमा ८ वटा वडामा पालिकाको २० वटा सहित ६५ वटा योजनाहरु र ३ वटा क्रमागतसहित ६८ वटा योजना रहेकोमा ११ वटा योजनाहरु ठेक्का प्रक्रियामा गई कार्यान्वयनको प्रक्रियामा छ भने ३१ वटा उपभोक्ता समिति गठन भई ६ वटाले काम समेत सम्पन्न गरिसकेको सभामा प्रस्तुत गरेकोे प्रतिवेदनमा उल्लेख गरिएको छ ।
पालिका र वडाअन्तर्गत रहेको १४ वटा योजनाहरु भने सम्झौताको प्रक्रियामा रहेको छ । त्यसैगरी गाउँपालिकाको प्रशासनिक भवन निर्माणका लागि बोलपत्र अह्वान गरी केही दिनमा सम्झौता हुने भोक्राहा नरसिंह गाउँपालिकाका प्रमुख प्रशासकीय अधिकृत रामचरित्र मेहताले बताएका छन् ।
भोक्राहा नरसिंह गाउँपालिकाका अध्यक्ष महेन्द्र प्रसाद यादवको अध्यक्षतामा गाउँ सभा सम्पन्न भएको थियो भने सो पालिकाका आठ वटै वडाका वडा अध्यक्षहरु लगायतको सहभागिता रहेको थियो ।
