पवन रौनियार
लौकही । उद्योग वाणिज्य संघ लौकहीको अध्यक्ष पदमा दुई जनाले उम्मेदावरी दिएका छन् । शनिबार उद्योग वाणिज्य संघ लौकहीको छैठौं साधारणमा नयाँ नेतृत्व चयनका लागि आपसी सहमति हुन नसकेपछि फागुन २४ सोमबार निर्वाचन हुने भएको छ ।
उवासंघ लौकहीको अध्यक्ष पदमा दुई जनाले उम्मेदवारी दिएका हुन् । उद्योग वाणिज्य संघ लौकहीको अध्यक्ष पदमा विश्वेश्वरप्रसाद गुप्ता र रामनारायण पौदारबीच प्रतिस्पर्धा हुने भएको छ ।
उद्योग वाणिज्य संघ लौकहीको छैठौं साधारणसभामा उपाध्यक्ष पदमा चन्दनकुमार यादव निर्विरोध निर्वाचित भएका छन् । सचिव पदमा सत्यवान मण्डल र रोशनीकुमारी मेहता (यादव) बीच प्रतिस्पर्धा हुनेछ ।
उद्योग वाणिज्य संघ लौकहीको कोषाध्यक्षमा विनोदकुमार यादव निर्विरोध निर्वाचित भएका छन् । सदस्यहरुमा अर्जुन मेहता, दीलिप झा, दानालाल यादव, नारायण साह, प्रमोदकुमार साह, राजीवप्रसाद गुप्ता, लक्ष्मीनारायण शरण निर्विरोध निर्वाचित भएकोे निर्वाचन समितिले जनाएको छ ।
उवासंघ लौकहीको अध्यक्ष पदमा उम्मेदवारी दिएका इलियास आलमले अध्यक्ष पदमा उम्मेदवारी फिर्ता लिएपछि उवासंघ लौकहीको अध्यक्ष पदमा दुई जना उम्मेदवार भएका छन् । यसैगरी सदस्यहरुमा कालु साह र रविन्द्र कुमार यादवले उम्मेदवारी फिर्ता लिएपछि सदस्यहरुमा सात जना निर्विरोध चयन भएका हुन् ।
उद्योग वाणिज्य संघ लौकहीको छैठौं साधारणसभाको उद्घाटन कोसी गाउँपालिकाका अध्यक्ष ऐयुव अन्सारीले गरेका थिए । उद्घाटन कार्यक्रमलाई सम्बोधन गर्दै कोसीका अध्यक्ष अन्सारीले आउँदो दिनमा उवासंघ र व्यापारीहरुलाई सहयोग गर्ने प्रतिबद्धता व्यक्त गरेका छन् ।
अध्यक्ष अन्सारीले गाउँपालिकाबाट उवासंघलाई व्यवस्थापन गर्नका लागि पालिकाबाट बजेट विनियोजन गरी सहयोगसमेत गर्ने बताए । व्यापारीहरुको हक अधिकारका लागि आफू आवाज उठाउने र समस्यामा साथ–सहयोगसमेत रहने उनले बताए ।
कार्यक्रममा कोसी गाउँपालिकाकी उपाध्यक्ष अनिता यादव, उद्योग वाणिज्य संघ इनरुवाका अध्यक्ष वीरेन्द्र साह, कोसी–१ का वडाध्यक्ष राजकुमार साह, नेपाली कांग्रेस क्षेत्र नम्बर ४ का क्षेत्रीय उपसभापति सदान्नद मण्डललगायतले धारणा व्यक्त गरेका थिए ।
अध्यक्ष र सचिव पदका लागि सहमति हुन नसकेपछि फागुन २४ गते सोमवार निर्वाचनबाट टुङ्गो लाग्ने निर्वाचन समितिका संयोजक तथा उद्योग वाणिज्य संघ इनरुवाका उपाध्यक्ष गिरिराज अटलले जानकारी दिए । उवासंघ लौकहीको अध्यक्ष अरुण यादवको अध्यक्षतामा उद्घाटनसत्र सम्पन्न भएको सो कार्यक्रममा सचिव सत्यवान मण्डलले स्वागत मन्तव्य राखेका थिए भने कोषाध्यक्ष विनोद यादवले प्रतिवेदन प्रस्तुत गरेका थिए ।
उवासंघ इनरुवाका सचिव तथा निर्वाचन समिति सदस्य रोशनकुमार खड्का, निर्वाचन समिति सदस्य चन्द्रप्रसाद रिजाल, पूर्व लौकही गाविस अध्यक्ष देवकृष्ण यादव उर्फ (गोबर्धन), व्यापारी रामचन्द्र यादव लगायतले वर्तमान अवस्थामा व्यापारीहरुले खेल्नुपर्ने भूमिका बारेमा धारण राखेका थिए ।
