इनरुवा । नेपाल पत्रकार महासंघ मोरङ शाखाको सम्पन्न बैठकले ‘षष्टिका बस्नेत सूचनाको अधिकार पुरस्कार’ नेपाल पत्रकार महासंघका पूर्वअध्यक्ष धर्मेन्द्र झासहित झापाका पत्रकार मोहनकाजी न्यौपानेलाई प्रदान गर्ने निर्णय गरेको छ ।
महासंघ मोरङ शाखाले नेपाल पत्रकार महासंघका पूर्वअध्यक्ष तथा सूचना क्षेत्रमा अभियन्ता धर्मेन्द्र झालाई नगद ५० हजार ५१ रुपैयाँ र प्रमाणपत्रसहित षष्टिका बस्नेत सूचनाको अधिकार पुरस्कार–२०७६ प्रदान गर्ने निर्णय गरेको हो ।
यसैगरी नेपाल पत्रकार महासंघ झापाका पूर्वअध्यक्ष मोहनकाजी न्यौपानेलाई पनि नगद १५ हजार १५ रुपैयाँ र प्रमाणपत्रसहित षष्टिका बस्नेत सूचनाको अधिकार प्रोत्साहन पुरस्कार–२०७६ प्रदान गरिने नेपाल पत्रकार महासंघ मोरङ शाखाका अध्यक्ष बन्धु पोखरेलले जानकारी दिएका छन् ।
उनीहरूलाई सूचना अधिकारको क्षेत्रमा पु¥याएको योगदानको उच्च मूल्यांकन गर्दै यी पुरस्कार दिने निर्णय गरिएको मोरङ शाखाले जनाएको छ । महासंघ मोरङ शाखाले यसअघि षष्टिका बस्नेत सूचनाको अधिकार पुरस्कार–२०७५ बाट शिव गाउँलेलाई सम्मानित गरेको थियो ।
त्यस्तै, सोही पुरस्कार २०७४ सालमा तारानाथ दाहाल र २०७३ सालमा विनय कसजूलाई प्रदान गरिएको थियो । प्रोत्साहन पुरस्कार यसअघि गणेश लम्साल र राजु श्रेष्ठलाई प्रदान गरिएको थियो ।
अहिले वितरण गर्न लागिएको पुरस्कार गत वर्षको चैत १६ गते नेपाल पत्रकार महासंघको स्थापना दिवसका दिन वितरण गर्ने गरी तयारी समेत गरेको अवस्थामा कोभिड–१९ र चैत ११ गतेदेखिको लकडाउनले गर्दा रोकिएको थियो ।
पुरस्कार हरेक वर्ष चैत १६ गते नेपाल पत्रकार महासंघको स्थापना दिवसका अवसरमा प्रदान गर्ने प्रचलन रही आएकोमा यस वर्ष महासंघको निर्वाचन तालिका प्रकाशित भई कार्यक्रम प्रभावित हुने अवस्थालाई मध्यनजर गर्दै यही फागुन २८ गते, शुक्रबार पुरस्कार वितरणको कार्यक्रमको आयोजना गर्ने निर्णय गरिएको छ ।
सोही दिन दुवै जनालाई उक्त पुरस्कारबाट सम्मानित गरिने मोरङ शाखाले जनाएको छ । नेपालमा पनि नागरिकको सूचनाको हकको संरक्षण, सम्वद्र्धन र प्रचलन गर्नका लागि विभिन्न अभियन्ताले काम गर्दै आएको सन्दर्भमा त्यस्ता अभियन्ताहरूलाई थप प्रोत्साहन गर्न नेपाल पत्रकार महासंघ मोरङ शाखाले सात लाखको अक्षयकोष विसं।
२०७३ सालमा खडा गरेको हो । उक्त कोष सूचनाका अधिकारकै क्षेत्रमा कार्यरत विराटनगर–११ निवासी केदार बस्नेतले आफ्नी दिवगंत पत्नी षष्टिका बस्नेतको नाममा स्थापना गरेका हुन् ।
