इनरुवा।इनरुवा नगरपालिकाका प्रमुख राजन मेहताले आफ्नो मासिक तलब र सेवा सुविधाबाट प्राप्त हुने रकमबाट इनरुवा–२ का एक सय ३० परिवारको निःशुल्क स्वास्थ्य बिमा गराएका छन् ।
उनले इनरुवा–२ मगर टोलका विपन्न तथा गरिब परिवारको निःशुल्क स्वास्थ्य बिमा गरिदिएका हुन् । नगर प्रमुख मेहताले आफ्नो मासिक तलब र सेवा सुविधाबाट प्राप्त हुने रकमले ती परिवारको स्वास्थ्य बिमा गराएको बताएका छन् ।
निःशुल्क स्वास्थ्य बिमा कार्यक्रममा सबैको पहुँच स्थापित गराउन आफूले सहयोग गरेको उनले बताए । मेहताले सरकारी बिमा कार्यक्रम भरपर्दो र सबैका लागि लाभदायी रहेकाले व्यक्तिगत पहलमा विपन्न तथा गरिब परिवारको स्वास्थ्य बिमा गराएको बताए ।
उनले आर्थिक अभावमा स्वास्थ्य सुविधाबाट बञ्चित हुन सक्ने परिवारलाई लक्षित गरी निःशुल्क स्वास्थ्य बिमा गरिदिएको बताए प्रदेश एकका प्रमुख प्रतिपक्षी दलका नेता एवम राजीव कोइरालाले निःशुल्क स्वास्थ्य बिमा कार्यक्रमको उद्घाटन गरेका थिए ।
कोइरालाले नगर प्रमुखले चालेको कदम सराहनीय र प्रशंसायोग्य रहेको बताए ।
उनले यस्ता कार्यक्रमले जनता र जनप्रतिनिधिबीच भावनात्मक सम्बन्धको बिकास गराउने विश्वास व्यक्त गरे । कार्यक्रममा बोल्दै नगर प्रमुख मेहताले सरकारका राम्रा काम र नीतिको सबैले अवलम्बन गर्नुपर्ने धारणा राखेका थिए ।
मेहताले स्वास्थ्य बिमा कार्यक्रमले स्वास्थ्योपचारमा सबैको सहज र सरल पहुँच स्थापित गराउने बताए ।नगर प्रमुख मेहताले नगरभित्रका अन्य वडामा बसोबास गर्ने विपन्न र गरिब परिवारलाई समेत क्रमशः निःशुल्क स्वास्थ्य बिमा कार्यक्रममा समेट्नेसमेत उद्घोष गरे ।
बिमा दर्ता सहयोगी बहाव अन्सारीका अनुसार नगर प्रमुखको निःशुल्क बिमा अभियानमा एक सय ३० परिवारका लगभग छ सय ५० जना समेटिने छन् । उनीहरुको विवरण अपडेट गर्ने क्रम थालिएको अन्सारीले बताए ।
मेयरले निःशुल्क स्वास्थ्य बिमा गराइ दिएवापत एक सय ३० परिवारको हकमा चार लाख ५५ हजार रुपैयाँ स्वास्थ्य बिमा बोर्ड सुनसरीलाई बुझाउनु पर्ने छ । अन्सारीले सबैको फारम भरि सकेपछि नगर प्रमुखले रकम उपलब्ध गराउने बताए । स्वास्थ्य बिमा कार्यक्रममा समेट्न लागिएको परिवारले जेठ १ गतेबाट स्वास्थ्योपचार सेवा लिन पाउने छन् ।
