काठमाडौं । नेकपा माओवादी अध्यक्ष पुष्पकमल दाहाल प्रचण्डलाई छाडेर एमाले अध्यक्ष केपी शर्मा ओली पक्ष लागेका गृहमन्त्री रामबहादुर थापा बादललाई उपाध्यक्ष बनाउने तयारी भएको छ।
प्रचण्डलाई छाडेर माओवादीका बादलसहित टोपबहादुर रायमाझी, लेखराज भट्ट, मणि थापा, अध्यक्ष प्रभु साह, दावा तामाङलगायत नेता ओली खेमामा लागेका थिए।
सर्वोच्च अदालतले साविककाे पार्टी कायम गरिदिएपछि अध्यक्ष प्रचण्डसँग रहेका एमाले नेताहरु फर्किसकेका छन्। तर, माओवादी नेताहरु एमालेमै रहने भएका छन्। प्रधानमन्त्री ओलीले माओवादी नेताहरुलाई एमालेमै राख्न तल्लो तहसम्म समायोजनका लागि २० प्रतिशत हिस्सा दिने तयारी भएको बुझिएको छ।
प्रचण्डलाई छाडेर ओलीतिर लागेका ऊर्जामन्त्री रायमाझीले गृहमन्त्री बादललाई उपाध्यक्ष बनाउने बिषयमा छलफल भएको बताए। ‘उहाँलाई उपाध्यक्ष बनाउने विषयमा छलफल भएको हो। तर, निर्णयमा पुगिसकेको अवस्था होइन’ उनले बताए ।
माओवादी नेताहरुसँग एमाले अध्यक्ष ओली, महासचिव ईश्वर पोखरेल, उपमहासचिव विष्णु पौडेल र संसदीय दलका उपनेता सुवास नेम्वाङ लगायतले छलफल गरिरहेका छन्।
एमालेतिर लागेका नेताहरु एमाले नफर्किने सार्वजनिक रुपमै बतारहे पनि माओवादीले भनेर यस विषयमा छलफल गरिरहेको नेता नारायणकाजी श्रेष्ठले बताए ।
‘उहाँहरुले आफ्नो दृष्टिकोण आधिकारिक रुपमा हामीसँग सार्वजनिक गर्नुभएको छैन। उहाँहरुको निर्णयपछि हामीले के गर्ने भन्ने निर्णय गछौँ’, उनले बताए ।
श्रोत : थाहा खबर
