इनरुवा । नेपाली कांग्रेस सुनसरीको बैठकले चार बुँदे निर्णय गरेको छ । नेपाली कांग्रेस सुनसरीको पार्टी कार्यालयमा आइतबार बसेको बैठकले चार बुँदे निर्णय गरेको हो ।
बराहक्षेत्र नगरपालिका–१ का वडाध्यक्ष सुरेश श्रेष्ठलाई विनाकारण पुस २७ गते जिल्ला प्रहरी कार्यालय सुनसरीमा ६ घण्टा नियन्त्रणको विरुद्धमा नेपाली कांग्रेसले घोर भत्सर्ना गरको छ । वडाध्यक्ष श्रेष्ठलाई विनाकारण प्रहरी कार्यालयमा नियन्त्रण लिएकोमा सुनसरी कांग्रेसले घोर भत्र्सना गर्दै नेपाली कांग्रेसका नेता तथा कार्यकर्ताहरुमाथि प्रहरीले मनोमानी ढङ्गबाट नियन्त्रण लिनु गैरकानुनी भएको नेपाली कांग्रेस सुनसरीको ठहर छ ।
सुुनसरी प्रशासनले गरेको गतिविधि बिरुद्ध कांग्रेसले भोली सोमबार सुनसरीका प्रमुख जिल्ला अधिकारी उमेश ढकाललाई ज्ञापनपत्र बुझाउने कार्यक्रम रहेको नेपाली कांग्रेस सुनसरीका सचिव केदार भण्डारीले बताएका छन् । नेपाली कांग्रेसका क्रियाशील सदस्य नवीकरण र नयाँ क्रियाशील सदस्यले सम्पूर्ण प्रक्रिया पूरा गरी क्षेत्रीय कार्यसमितिले चैत्र ५ गतेभित्र नेपाली कांग्रेस जिल्ला कार्यसमिति सुनसरीलाई बुझाइसक्नुपर्ने आइतबारको बसेको बैठकले निर्णय गरेको छ ।
सुनसरीको धरानमा चैत्र १० गते ५६ औं छुवाछुत विभेद अन्तर्राष्ट्रिय दिवस कार्यक्रमको प्रमुख अतिथि नेपाली कांग्रेसका केन्द्रीय सभापति शेरबहादुर देउवाले उद्घाटन गर्ने भएका छन् । सो दिवसलाई सफल पार्नका लागि नेपालीका कांग्रेसका सबै भातृ संगठनका पदाधिकारीहरु र कांग्रेसप्रति आस्था राख्ने सबैलाई उपस्थितिका लागि नेपाली कांग्रेस सुनसरीले अनुरोध गरेको छ ।
नेपाली कांग्रेस सुनसरीका सभापति राजीव कोइराला, उपसभापति प्रदीप चौधरी, हरिलाल मेहता, सचिव केदार भण्डारी, कोषाध्यक्ष पंकज महतोलगायत जिल्ला कार्यसमितिका पदाधिकारीहरुको उपस्थिति रहेको थियो ।
