इनरुवा । नेपाली कांग्रेस इनरुवा नगर कार्यसमितिले प्रशिक्षण तथा अगुवा कार्यकर्ता भेला सम्पन्न गरेको छ । नेपाली कांग्रेसले संगठन बिस्तार तथा सुदृढिकरण अभियान अन्तरगत सोमवार प्रशिक्षण तथा अगुवा कार्यकर्ता भेला सम्पन्न गरेको हो ।
पार्टी जिल्लाको प्रत्येक पालिका र वडा तहसम्मै आफनो प्रशिक्षण तथा अगुवा कार्यकर्ता भेला गर्ने क्रममा इनरुवा नगर समितिले समेत भेला सम्पन्न गरेको नगर सचिव धिरज भट्टराईले बताए । भट्टराईका अनुसार नगर सभापति तथा नगर सदस्य सहितको उपस्थितीमा भेला कार्यक्रम सम्पन्न गरेको हो ।
सम्पन्न भेलालाई सम्वोधन गर्दै इनरुवा नगरप्रमुख राजन मेहताले पार्टी नगर क्षेत्रको विकास र जनहितमा काम गर्दै आएकोले त्यसमा सबैको साथ र सहयोग आवश्यक रहेको बताए । मेहताले कांग्रेसको काम हेरेर केही विपक्षीहरु आतिएकाले त्यसमा पार्टीका नेता तथा कार्यकर्ताहरुले आफूले गरेको कामको यथार्थ मूल्याङ्कन गर्न आग्रह गरें ।
उनले इनरुवा नगर क्षेत्रको विकास विगतको तुलनामा आफनो नेतृत्वमा सयौ गुणा बढी विकास भएकाले यो कुरा प्रत्येक नागरिकको घरघरमा जानकारी गराउन पार्टी कार्यकर्ताहरु सक्रिय हुन जरुरी रहेको समेत बताए । प्रशिक्षण तथा भेलामा नगर क्षेत्रका पदाधिकारी र १० वटै वडाका वडा सभापति सहित दुई सय ५० बढी नेता तथा कार्यकर्ताहरुको सहभागिता रहेको नेपाली कांग्रेस वडा नम्बर–३ का वडा सभापति सुनोज निरौलाले बताए ।
निरौलाका अनुसार प्रशिक्षण कार्यक्रममा नेता तथा कार्यकर्ताहरुलाई पार्टीको संशोधित विद्यान, नीती तथा कार्यक्रम र पार्टीको विकासमा भूमिका विषयमा प्रशिक्षक वीरेन्द्र साहले प्रशिक्षण दिएका थिए । अगुवा कार्यकर्ता प्रशिक्षण तथा भेला कार्यक्रममा नेपाली कांग्रेस इनरुवा नगर कार्य समितिले आफनो संगठन विस्तार गर्दै मनोनित सदस्यहरु थप गरिएको छ ।
थप गरिएका मनोनित सदस्यहरुमा चन्दा रिजाल, मधु रिजाल, कमला रिजाल, मिलन पौडेल, सत्य यादव, रिमा सुवेदी, हिमा सुवेदी दुलाल, सुशिला बस्नेत, अरविन्द केसी, निर्मला सुवेदी, सकुन्तला दुलाल सहित २२१ समिति विस्तार गरिएको युवा नेता तथा वडा नम्बर–३ का सभापति निरौलाले जानकारी दिएका छन् ।
यसैबीच जिल्लाका १२ पालिकाको एक सय २४ वडा मध्ये सोमवार सम्ममा ५९ वटा वडामा अगुवा कार्यकर्ता भेला तथा प्रशिक्षण कार्यक्रम सम्पन्न् भएको पार्टीले जनाएको छ । पार्टीका प्रशिक्षक वीरेन्द्र साहका अनुसार प्रत्येक वडाका पार्टी वडा सभापति, नगर/गाउँ सभापति सहित पदाधिकारीहरुलाई प्रशिक्षण गरिएको छ । प्रशिक्षण अन्र्तगत दुहबी, बर्जु, इनरुवा,गढी सहितका पालिका र वडाहरुमा प्रशिक्षण तथा भेला कार्यक्रम सम्पन्न भएको छ ।
