टोमराज मेहता
इनरुवा । नेपाली कांग्रेसका केन्द्रीय सदस्य तथा पूर्व अर्थमन्त्री ज्ञानेन्द्रबहादुर कार्कीले नेपाली कांग्रेसको प्राथमिकता सरकार नभई संविधानको रक्षा र संरक्षण रहेको बताएका छन् ।
सुनसरीको इटहरीमा नेपाल पत्रकार महासंघ सुनसरीको पुरस्कार वितरण कार्यक्रमलाई सम्वोधन गर्दै कार्कीले देश संकटपूर्ण अवस्थामा रहेको र राजनीतिक अस्थिरता सिर्जना भएकाले सरकार भन्दा संविधानको रक्षा पहिलो प्राथमिकता रहेको बताएका हुन् ।
उनले देशमा दुई तिहाईको सरकार र नेतृत्वकर्ता दलको कारण देशमा अस्थिरता सिर्जना भएको र राजनीतिक संकट समेत सिर्जना भएकाले संविधान धरापमा पर्ने आशंका उत्पन्न भएकाले नेपाली कांग्रेस सत्ता भन्दा संविधान रक्षाको पक्षमा रहेको बताए ।
सुनसरी क्षेत्र नम्बर ४ का सांसद् समेत रहेका कार्कीले अहिले नेपाली कांग्रेस हतार गरेर सरकारमा जानु भन्दा नेपाली जनताको बलिदानीबाट प्राप्त संविधानको रक्षा र नेपाली जनताको भावनाको कदर गर्ने पक्षमा रहेको स्पष्ट पारें ।
उनले अहिले २०५१ सालको जस्तो अवस्था नरहेको र गणतन्त्र प्राप्त गर्न नेपाली कांग्रेसले खेलेको भूमिका महत्वपूर्ण रहेकाले सरकार भन्दा गणतन्त्र र संविधानको रक्षा गर्नुपर्ने आवश्यक रहेको बताए ।
उनले नेपाली कांग्रेस गणतन्त्र र संघीयताको रक्षा सहित संविधानको संरक्षण गर्ने सहित जनतालाई सेवा सुविधा प्रवाह गर्ने पक्षमा रहेकाले कोही कसैलाई दुविधामा पर्न नहुने बताए ।
उनले देशमा जब जब संकट आउछ तब तब नेपाली कांग्रेसको भूमिका महत्वपूर्ण हुन्छ , त्यसैले अहिले तछाड मछाड गरेर सरकारमा जानका लागि मात्रै सरकारमा नभई देशको अन्योलता र अस्थिरताको अन्त्यका लागि आवश्यक परे सहजीकरण गर्ने समेत बताए ।
उनले कांग्रेस जहिले पनि संकटको बेला निर्णायक भूमिका निर्वाह गर्दै आएकोले अहिले पनि त्यस्तो अवस्था आए कांग्रेसले आफनो जिम्मेवारी निर्वाह गर्ने टिप्पणी गरें । सांसद् कार्कीले जनता भगवान भएकाले उसलाई रिसाएर र दुःख दिएर कुनै फल नपाउने भएकाले जनतालाई सिधा सरल र सुलभ सेवा तथा सुविधा दिनका लागि पार्टी तयार रहेको बताए । उनले सरकार भनेको सेवा गर्ने संस्था भएकोले जनताको सेवा र पूर्ण प्रेस स्वतन्त्रताको पक्षमा काम गर्नुपर्ने हो तर त्यसो नगरेका कारण संकट उत्पन्न भएको बताए ।
उनले संविधानको सर्वोच्चता, पूर्ण प्रेस स्वतन्त्रता, नागरिक अधिकारको रक्षाको पक्षमा पार्टी रहेको बताउँदै भदौमा हुन लागेकोे १४ औं महाधिवेशनलाई सम्पन्न गरेर लोकतान्त्रिक संगठनलाई बलियो बनाउन एकजुट भएर समृद्धिका बाटोका निम्ति अगाडि बढ्ने समेत बताए ।
कार्कीले कांग्रेस जहिले पनि तरल अवस्थाको समेत निकासका लागि निर्णायक भूमिकामा रहने बताए । उनले दुई तिहाईको सरकारले देश र संविधानलाई समेत दुरुपयोग गरेकाले त्यसका विरुद्धमा पत्रकारले कलम चलाउनु पर्ने र पत्रकारहरुको जमघटबाट समस्या समाधानका लागि निरन्तर खबरदारी आवश्यक रहेको बताए ।
यसैबीच सोही कार्यक्रमलाई सम्वोधन गर्दै नेपाल पत्रकार महासंका पूर्व केन्द्रीय अध्यक्ष धर्मेन्द्र झाले पत्रकारितालाई व्यवसायिक र मर्यादित बनाउनुुपर्ने आवश्यकता रहेको बताए ।
झाले पत्रकारितालाई जीवनयापन र समाजसेवाका रुपमा लिन जरुरी रहेको बताउँदै पूर्व अर्थमन्त्री कार्कीलाई नीतिगत व्यवस्था कांग्रेसकै पालामा भएपनि कार्यान्वयनको अवस्था फितलो रहेकाले त्यसमा थप सुधार सहित काम गर्न आग्रह गरेका थिए ।
झाले पत्रकारिताको क्षेत्रमा पूर्व प्रधानमन्त्री गिरीजा प्रसाद कोइरालाको नाममा विकास पत्रकारिता पुरस्कारले समेत एउटा इटा थप्ने काम भएको बताए । उनले सो कार्यका लागि पूर्व अर्थमन्त्री कार्कीले गर्नुभएको योगदान प्रशंसा योग्य रहेको बताए ।
नेपाल पत्रकार महासंघ सुनसरीको अध्यक्ष अमर खड्काको अध्यक्षतामा सम्पन्न भएको कार्यक्रममा पत्रकार सुविद गुरागाई, गोपाल देवान, जयकृष्ण यादव, शालिग्राम पाण्डे, लिलाराज भट्टराई,धुव्र ढकाल, महासंघ सनुसरीका पूर्व अध्यक्ष कृष्णविनोद लम्साल, पूर्व प्रदेश प्रमुख गोविन्द तुम्वाहाम्फे लगायतकाले आफना धारण राखेका थिए ।
