इनरुवा। सुनसरीको देवानगञ्ज गाउँपालिका–४ कप्तानगञ्जकी सीताकुमारी मेहताले प्रहरीमा उजुरी दिएपछि मुद्दा दर्ता गर्न नमानेको गुनासो गरेकी छिन् । २६ वर्षीया सीताकुमारी मेहताले भतिजाहरुले आफू र आफ्नो श्रीमान्लाई कुटपिट गरेको र उनीहरुविरुद्ध जिल्ला प्रहरी कार्यालय सुनसरीमा उजुरी दिए पनि मुद्दा गर्न नमानेको गुनासो गरेकी छिन् ।
प्रहरीले आफूहरुलाई आलटाल गरेको भन्दै पीडकहरुलाई कारवाही नगरी उल्टै आफूहरुलाई हप्काउने गरेको गुनासो गरेकी छिन् । शनिबार पत्रकार सम्मेलनको आयोजना गरी भतिजाहरु राजीवकुमार मेहता, ललन मेहता र बुहारी ऋचा मेहताले आफू र आफ्नो श्रीमान् लक्ष्मण मेहतालाई निर्घात कुटपिट गरेको विषयमा प्रहरी कार्यालयमा उजुरी दिएपनि बेवास्ता गरेको बताइन् ।
् न्याय दिने ठाउँमा प्रहरीले पीडकहरुसँग मोटो रमक लिई आफूहरुको मुद्दालाई हलुको बनाई कुनै वास्ता नगरेको र मुद्दा दर्ता नगरी उल्टै प्रहरी कार्यालयमा हेप्ने गरेको पत्रकार सम्मेलनमा सुनाइन् । मेहताले आफू र आफ्नो श्रीमान्लाई भतिजाहरुले कुटपिट गरेको गर्धनमा गहिरो चोट पु¥याएको विषयमा प्रहरी प्रशासनमा उजुरी गर्दा सुनुवाइ नगरेको गुनासो गरेकी हुन् ।
सीमावर्ती गाउँ कप्तानगञ्जमा बाँस काट्ने निहुमा भएको विवादपछि स्थानीय ललन मेहता र राजीव मेहताले सीता र लक्ष्मणलाई फागुन १८ गते निर्घात कुटपिट गर्नुका साथै घाँटी बटारेर मार्ने प्रयास गरेको घटनाको दुई हप्ता बित्दासमेत प्रहरीले बेवास्ता गरेको पीडित परिवारको गुनासो छ ।
नजिकै प्रहरी भएर पनि समस्यामा बोलाउँदा नआएको र घटना भएपछि घाइतेलाई उपचारको व्यवस्था मिलाइदिन भन्दा उल्टै प्रहरीले हप्काईदप्काई गरेको पीडितहरुले पत्रकार सम्मेलनमा बताएका छन् । सीता मेहताले भतिजाहरुले आफूलाई लुगा च्यातेर कुटपिट गरेको फोटो प्रहरीमा देखाए पनि कुनै वास्ता नगरेको बताउँदै आफूले श्रीमान्को उपचार खर्चमा एक लाखभन्दा बढी खर्च गरिसकेको र अझै गर्न बाँकी रहेको बताइन् ।
पीडितले इलाका प्रहरी कार्यालय देवानगञ्ज र जिल्ला प्रहरी कार्यालय सुनसरीमा पटक–पटक न्यायका लागि गुहारे पनि कुनै वास्ता नगर्दा आफूहरु समस्यामा परेको बताए । प्रहरीले पीडकहरुसँग मिलोमतो गरेको र मोटो रकम लिएको उनीहरुले आरोपसमेत लगाएका छन् । पीडित मेहताले प्रहरीले उचित न्याय दिलाउनुपर्ने ठाउँमा उल्टै पीडकहरुसँग लेनदेन गरी उनीहरुलाई कारवाही नगरी मनोवल बढाउने काम गरेको बताइन् ।
सुनसरीका प्रहरी नायव उपरीक्षक नरेन्द्रकुमार कार्कीले पीडितले भनेजस्तो नभएको र सामान्य विवादमा पनि ठूलो अस्पतालमा गएको विषयमा बुझ्ने प्रयास मात्रै भएको र दुवै पक्षलाई केहीबेर नियन्त्रणमा राखेर छाडिएको बताए । कतिपय अवस्थामा घटना एउटा र जाहेरी अर्कैखालको आउँदा समस्या भएको र त्यस्ता मुद्दाले प्रहरीलाई समेत हैरान पारेको बताए ।
