इनरुवा । सुनसरीको देवानगञ्ज गाउँपालिका–३ कप्तानगञ्जका नारायण मेहताले आफूलाई जिल्ला प्रहरी कार्यालय सुनसरीभित्र विनाकारण चार घण्टा थुनेर यातना दिएको आरोप लगाएका छन् ।
आफ्नै मामामाइजुको विवादका बारेमा बुझ्नका लागि चैत ५ गते बिहीबार जिल्ला प्रहरी कार्यालय सुनसरीमा पुग्दा आफूलाई मुद्धा बढाउन दबाव दिने नाइकै भन्दै प्रहरीले चार घटना विनाकारण हिरासतमा राखेर चरम यातना दिएको खुलासा गरेका छन् ।
प्रहरी परिसरबाट गिरफ्तार गरेलगत्तै आफूलाई डिएसपी सर (नाम थाहा नभएको प्रहरी)ले आफूलाई माथिल्लो कोठामा लगि मुक्का, लात्तीले हिर्काएर चरम यातना दिएको पत्रकार सम्मलेन गरेर जानकारी दिएका छन् । मेहताले आफ्नो टाउको दुखेको, खान–सुत्न समस्या भएको र पाँच घण्टासम्म बेहोस जस्तो बनाएर कोठामा थुनेर घटना मिलाउन दबाब दिएको र पीडित पक्षलाई सहयोग नगर्न भनेर चार घण्टा थुनेर यातना दिएको उनले पत्रकार सम्मेलनमा आरोप लगाएका छन् ।
प्रहरीको यातनाबाट शरीरमा दुखाइ बढेको, कान सुन्न समस्या भएको र टाउको दुखेकाले स्थानीय निजी क्लिनिकमा दुखाइ कम गर्ने औषधि किनेर सेवन गरेको बताए । ‘यातनाको विषयमा कानुनी उपचार गरिएको छैन,’ मेहताले भने, ‘न्यायका लागि पत्रकार सम्मेलन गरी दोषीलाई कारवाही गरी आफ्नो उपचारको व्यवस्था मिलाउन आग्रह गरेका छन् ।
पीडित मेहताले पत्रकार सम्मेलनबाट गरिएको गुनासोबाट सुनुवाइ नभए राष्ट्रिय मानवअधिकार आयोग र इन्सेकमा उजुरी गर्ने तथा जीवनरक्षाका लागिसमेत निवेदन दिने बताए । मेहताका अनुसार प्रहरी प्रशासनले झुठा मुद्दामा फसाउनका निम्ति जबरजस्ती अरुको सहजीकरण गर्न आउँदा यातना दिएकाले मानव अधिकार उल्लंघनसमेत भएको दावी गरेको हो ।
विनाकारण हिरासतमा राखेर यातना दिएको विषयमा सुनसरीका प्रहरी नायव उपरीक्षक नरेन्द्रकुमार कार्कीले पीडित र पीडकलाई उचाल्ने काम गरेकाले समान्य रुपमा हप्काएको प्रतिक्रिया दिएका छन् । विवाद मिलाउन सहज हुने भनेर केहीबेर छुट्टै कोठामा राखिएकोसमेत उनले प्रतिक्रिया दिए ।
