काठमाडौँ — नेवार समाजभित्रको सामाजिक र सांस्कृतिक संरचनाका तत्वलाई चिनारी गराउने गरी लेखक डा. बलराम कायस्थले ‘नेवार समाजको इतिहास र संस्कृति’ कृति प्रकाशनमा ल्याएका छन् ।
नेवार समाजमा पनि परम्परागत नेवार बस्तीको वास्तुसंरचना, सामाजिक संस्कार, स्वभाव र व्यवहार आदि सामग्रीको संयोजन जुटाएर लेखक कायस्थले मानवशास्त्र तथा समाजशास्त्रको व्याख्या दृष्टिमा कृति लेखेका छन् । रत्न पुस्तक भण्डारबाट प्रकाशित कृतिमा शताब्दीपुरुष सत्यमोहन जोशीको भनाइ छ—‘एकजना नेवार शिक्षित र धनजनले सम्पन्न पनि हुन सक्दछ । तर, यदि यसरी उच्च ओहोदामा पुगेका नेवारलाई म त नेवार हुँ भन्ने आत्मबोध भएन भने उनलाई सधैं नेवार समाजको अघिल्तिर शिर झुकाएर लघुताभाष बोध गरी बस्नुपर्ने हुन्छ ।’
यसअघि, ‘भक्तपुर शहरमा मनाइने केही ऐतिहासिक चाडपर्वहरु’ कृति प्रकाशन गरेका लेखक कायस्थले रापष्ट्रय अभिलेखालयमा रहेका सन्दर्भ सामग्री र हस्तलिखित ग्रन्थको सहयोगमा ‘नेवार समाजको इतिहास र संस्कृति’ लेख्न सकेको जनाएका छन् ।
