इनरुवा । सुनसरीको हरिनगर गाउँपालिकाका महिला स्वास्थ्य स्वयसेविकाहरुलाई मोबाइल स्वास्थ्य कार्यक्रम सम्बन्धी तीन दिने तालिम दिएको छ । प्राथमिक स्वास्थ्य केन्द्र हरिनगरमा मातृ तथा बाल स्वास्थ्य सेवा समन्वयका लागि मोबाइल स्वास्थ्य कार्यक्रम सम्बन्धी तीन दिने तालिम दिएको हो ।
हरिनगर गाउँपालिकाको समन्वय , प्रदेश १ सामाजिक विकास मन्त्रालयको सहयोग र करुणा फाउन्डेसनको सहकार्यमा आइतबारदेखि सुरु भएको तीन दिने तालिम मंगलबार सम्पन्न भएको छ । अपाङ्गता रोकथाम तथा पुनस्र्थापना कार्यक्रम अन्तर्गत मातृ तथा बाल स्वास्थ्य सेवा समन्वयका लागि मोबाइल स्वास्थ्य कार्यक्रम सम्बन्धी हरिनगरका महिला स्वास्थ्य स्वंयसेविकाहरुलाई तालिम दिएको गाउँपालिकाका अध्यक्ष गफार अन्सारीले बताएका छन् ।
तालिमको समापनमा अपाङ्गता भएका नवजात शिशु जन्म लिनुभन्दा पहिलेदेखि नै आवश्यतका अनुसार चेकजाँच गर्ने, समयमा उपचार गर्ने, स्याहारसुसार गर्ने लगायतका विषयमा महिला स्वास्थ्य स्वंयसेविकाहरुले मोबाइलबाट अपडेट गर्ने कार्यमा सक्रिय रहने बताएका छन् । महिला स्वास्थ्य स्वंयसेविकाहरुले तालिम लिएपछि वडामा गएर गर्भवती महिलाको तथ्याङ्क र उनीहरुमा देखा परेका समस्याहरुलाई मोबाइल एप्सबाट अपडेट गर्न सकिने अध्यक्ष अन्सारीले बताए ।
महिला स्वंयसेविकाहरुले सिकेका कुराहरु आ–आफनो कार्यक्षेत्रमा गएर प्रयोगात्मक तरिकाबाट सिकाईलाई प्रभावकारी बनाउन काम गर्ने प्रतिवद्धता व्यक्त गरेका छन् । मोवाईलबाट अपडेट गर्ने र कुनै समस्य भए प्राथमिक स्वास्थ्य केन्द्रलाई जानकारी गराउने महिला स्वास्थ्य स्वंयसेविकाहरुले समयमै जानकारी गराउने छिन् । स्वंयसेविकाहरुले गाउँ–गाउँमा गएर इमान्दारीता पुर्वक काम गर्ने र सिकाई भएकाले काम गर्न सजिलो हुने बताएकी छिन् ।
