सुबिन विश्वकर्मा
बराहक्षेत्र । सिटिजन लाइफ इन्स्योरेन्स कम्पनी लिमिटेड चक्रघटी शाखाले ॠण बिमितको मृत्यु दाबी वापतको भुक्तानी गरेको छ ।
बुधबार एक कार्यक्रम गरि साना किसान सहकारी संस्था, चक्रघटीको हलमा बिमित नैनाकुमारी राईले बिमा गरेको ४ लाख ८० हजार ऋणको भुक्तानी गरिदिएको चक्रघटी शाखाका प्रमुख धनराज कार्कीले बताए । उनका अनुसार काजकिरिया खर्च अन्तरर्गत १० हजार रुपैयाँ समेत प्रदान गरेको छ ।
बराहक्षेत्र ८ का नैनाकुमारीका छोरा कुशल राईलाई सिटिजन लाइफ इन्स्योरेन्स चक्रघटीका प्रमुख कार्की र क्षेत्रीय प्रबन्धक सुरज काफ्लेले सो रकमको चेक हस्तान्तरण गरेका हुन् ।
कम्पनीले सामाजिक उत्तरदायित्व अन्तरगत साना किसान कृषि सहकारी संस्थासँग समन्वय गरि ॠण दाबी भुक्तानी दिन सुरु गरेको बताइएको छ ।
यसअन्तर्गत सहकारीबाट ॠण लिने ब्यक्तिले इन्स्योरेन्स कम्पनीमा ॠण बिमा गर्नुपर्ने छ । बिमाको अबधि ४ वर्षको हुनेछ । उक्त अबधिभित्र बिमितको निधन भएमा इन्स्योरेन्स कम्पनीले भुक्तानी गर्नेछ भने बिमितले प्रत्येक १ लाखको ५सय ७५ का दरले बिमा गर्नुपर्ने प्रमुख कार्की बताउँछन् । हाल सहकारीका ४सय ८४ जना सदस्यले ऋण बिमा गरेका छन् भने एकजनाले भुक्तानी प्राप्त गरिसकेको जनाइएको छ ।
नैनाकुमारी साना किसानअन्तर्गत समूह १सय ८० की सदस्य हुन् । उनले २०७३ पौष महिनामा ऋण बिमा गरि सोही वर्षको माघ २५ गते मृत्यु भएको थियो ।
बिमा गरेको ४ वर्षभित्र बिमितको निधन भएको हुँदा सहकारीलाई बुझाउनु पर्ने ॠण वापतको रकम इन्स्योरेन्स कम्पनीले दिन्छ, कार्कीले भनें ।
