इटहरी । इटहरीका एकजनासहित दुईजनालाई लागूऔषधसहित प्रहरीले पक्राउ गरेको छ । झापा र मोरङको छुट्टा छुट्टै स्थानबाट लागूऔषधसहित दुईजनालाई प्रहरीले पक्राउ गरेको हो ।
पक्राउ पर्नेमा इटहरी २ का २५ वर्षीय अमृत मग्राती र झापा दमक नगरपालिका ४ का २३ वर्षीय सुमन धिमाल रहेका छन् । इलाका प्रहरी कार्यालय रानीबाट खटिएको प्रहरी टोलीले विराटनगर १६ दरैया स्थितबाट मग्रातीलाई एभिल ३ एम्पुल, लुपिजेसिक ३ एम्पुल, डाइजाल्याप ३ एम्पुल र फेनारगन ३ एम्पुलसहित नियन्त्रणमा लिएको हो ।
त्यस्तै, वडा प्रहरी कार्यालय भद्रपुरबाट खटिएको प्रहरी टोलीले भद्रपुर नगरपालिका ५ झिम्की चौक स्थितबाट धिमाललाई फेनारगन २० एम्पुल, डाईजेपाम २० एम्पुल र लुपिजेसिक २० एम्पुलसहित पक्राउ गरेको प्रदेश १ प्रहरी कार्यालय विराटनगरले जनाएको छ । पक्राउ परेका दुवैजनामाथि थप अनुसन्धान भइरहेको प्रहरीले जनाएको छ ।
