इनरुवा । सुनसरी सदरमुकाम इनरुवाबाट प्रकाशित प्रतीक्षण दैनिकका सम्पादक तथा प्रकाशक इकबाल अहमद नेपाल पत्रकार महासंघको केन्द्रिय सदस्यमा निर्वाचित भएका छन् ।
चैत २५ गते सम्पन्न नेपाल पत्रकार महासंघको २६ औं अधिवेशनमा नेपाल प्रेस युनियन,प्रेस सेन्टर नेपाल,प्रेस चौतारीलगायत १२ वटाविभिन्न गठबन्धनका साझा उम्मेदवार अहमद अल्पसंख्यक कोटाबाट केन्द्रिय सदस्यमा निर्वाचित भएका हुन । इनरुवाका इकबाल अहमद आफ्ना निकटतम प्रतिद्वन्द्वी दोलखाका लक्ष्मण थामीलाई ११३० मतले पछि पार्दै केन्द्रिय सदस्य पद विजयी भएका हुन ।
अहमदले ५ हजार १३९ मत ल्याई केन्द्रिय सदस्य पदमा निर्वाचित भए भने उनका निकटतम प्रतिद्वन्द्वी थामीले ४ हजार नौ मतमात्र ल्याए । यसैगरी सोही पदमा उम्मेदवारी दिएका नेपालगन्जका सेराजुद्दिन खानले ६८१ मत प्राप्त गरे । अढाई दशकदेखि सक्रिय पत्रकारिता गर्दै आएका इनरुवा बासिन्दा इकबाल नेपाल प्रेस युनियनको केन्द्रिय सदस्य,न्युनतम पारिश्रमिक समितिका सदस्य भइसकेका छन् ।
निर्वाचन आयोगको आधिकारिक घोषणा पश्चात् हर्षित मुद्रामा देखिएका निर्वाचित केन्द्रिय सदस्य अहमदले आफ्नो जितको श्रेय आफ्ना गुरुवर्ग र अग्रज पत्रकारहरुप्रति समर्पित गरेका छन् । यो जित मेरोमात्रै जित होइन मेरा आदरणीय गुरुवर्ग,अग्रज दाईहरुलगायतका सुनसरीदेखि केन्द्रिय तहका पत्रकार साथीहरूका कारण आज म केन्द्रिय सदस्य निर्वाचित भएको छु उनले भने ।
मलाई केन्द्रिय सदस्य जस्तो पदमा आफ्नो अमूल्य मत दिई विजयी गराउनुहुने तमामप्रति आभारी छु । कालान्तरमा गुरुवर्ग,अग्रज दाईहरुलगायतको सल्लाह,सुझाव र मार्गदर्शनअनुसार आफू अगाडि बढ्दै सदैव प्रेस स्वतन्त्रता,समावेशीता र श्रमजीवी र कलमजीविका पक्षमा वकालत गर्ने अहमदले प्रतिबद्धता व्यक्त गरे ।
ग्रामीण भेगबाट निरन्तर पत्रकारिता गर्दै आएकाले श्रमजीवी पत्रकारका समस्याका बारेमा आफू जानकारी भएको बताउदै उनले केन्द्रियस्तरमा उनीहरूका आवाज उठाउदै समस्याको समाधान गर्नु आफ्नो पहिलो दायित्व हुने बताए । इकबाल आहारसँगै सुनसरी बराह नगरपालिकाका भिशन राईसमेत केन्द्रिय सदस्य पदमा निर्वाचित भएका छन् ।
उनी आदिवासी जनजाति कोटाबाट निर्वाचित भएका हुन । भिशनले ४ हजार ८६८ मत ल्याई निर्वाचित भएभने उनका निकटतम प्रतिद्वन्दी विजयी चाम्लिङले ३ हजार २ मतमात्र ल्याए । प्रदेश नम्बर १ बाट नेपाल पत्रकार महासंघ सुनसरी शाखा वर्तमान अध्यक्ष अमर खड्कासमेत केन्द्रिय सदस्यमा निर्वाचित भएका छन् । नेपाल पत्रकार महासंघको केन्द्रिय कार्य समितिमा प्रेस युनियनका बिपुल पोखरेल नेतृत्वको प्यानल विजयी भएको छ ।
