टोमराज मेहता
इनरुवा।इनरुवा नगरपालिकाका नगर प्रमुख राजन मेहताले पत्रकारको पेशागत हकहतिका लागि आफू प्रतिबद्ध रहेको बताएका छन् । इनरुवा नगरपालिकाले आयोजना गरेको सम्मान कार्यक्रमलाई सम्बोधन गर्दै नगर प्रमुख मेहताले पत्रकारहरुको पेशागत हकहितमा सदैव काम गर्न प्रतिबद्ध रहेको बताए ।
नेपाल पत्रकार महासंघकोे पहिलो पटक प्रत्यक्ष निर्वाचन प्रणालीमार्फत् निर्वाचित भएका पत्रकारहरुलाई बधाई तथा शुभकामना दिँदै नगर प्रमुख मेहताले इनरुवाले ऐतिहासिक जित हासिल गरेको र अब आउने दिनमा पत्रकारिताको विकासमा थप मद्दत गर्ने बताए ।
इनरुवाले पत्रकारितामा फड्को मारेको भन्दै पत्रकारहरुले इनरुवामा विकास भएको वा नभएको कुराहरु जनतामाझ आ–आफ्नो सञ्चारमाध्यमबाट सुसूचित गरिदिनका लागि आग्रह गरेका थिए ।
इनरुवा सदैव अवसरबाट बञ्चित हुँदै आएको बेला यस निर्वाचनमा राम्रो सफलता र जित हासिल गरेकाले इनरुवाका पत्रकारहरुको उच्च मूल्याङ्कन गर्दै सम्मान गरेको नगर प्रमुख मेहताको कथन छ ।
सम्मानले काम गर्ने हौसला बढ्ने भएकाले अगामी दिनमा इनरुवाको नाम राख्न आग्रह गर्दै नगर प्रमुख मेहताले पहिले र अहिलेको इनरुवामा फरक भएको दाबी गरेका छन् । नगर प्रमुख मेहताले पेशागत हकहितका लागि सहकारी संस्था खोल्न र अक्षयकोष स्थापना गरे आफूले सहयोग गर्ने प्रतिबद्धता व्यक्त गरेका छन् । नगर प्रमुख मेहताले इनरुवाका पत्रकारहरु एकजुट भएर निर्वाचनमा गएकोले ठूलो उपलब्धि पाएको भन्दै अगामी दिनमा पनि एकजुट भएर अगाडि बढ्न अनुरोधसमेत गरेका थिए ।
देशभरकै मतबाट इनरुवाका पत्रकार इकवाल अहमदले अत्याधिक मत ल्याएर विजयी भएकाले इनरुवावासीको गौरवलाई बढाएको उनले बताए । इनरुवाबाट केन्द्रीय सदस्य, प्रदेश सदस्य, जिल्लामा पदाधिकारीहरु जितेकाले इनरुवा नगरपालिकाको शानलाई बढाएकाले पत्रकारलाई उच्च सम्मान गरेको उनले बताए ।
इनरुवालाई चिनाउन पत्रकारहरुको भूमिका रहेकै कारण महासंघको निर्वाचनबाट इनरुवाका पत्रकार इकवाल अहमदले पुनः इनरुवाको पहिचानलाई बलियो बनाउन सफल भएको उनको दाबी छ । नेपाल पत्रकार महासंघका केन्द्रीय सदस्य इकवाल अहमदले आफू देशभरकै अत्यधिक मत ल्याएर विजयी भएको बताए ।
इनरुवाबाट प्रतिनिधित्व गर्ने गरी केन्द्रीय सदस्यजस्तो गरिमामय पदमा विजयी भएकाले इनरुवाका पत्रकारहरुको हकहितका लागि इनरुवा नगरपालिकाले अभिभावकको भूमिका निर्वाह गर्नुपर्ने बताए । केन्द्रीय सदस्य अहमदले प्रेस स्वतन्त्रता, समावेशिता र श्रमजीवीका पक्षमा वकालत गर्ने प्रतिवद्धता व्यक्त गरेका छन् ।
इनरुवाले पहिलो पटक केन्द्रीय सदस्य पाएकाले इनरुवाको पत्रकारिताको विकासमा समेत ध्यान दिने उनले बताए । नेपाल पत्रकार महासंघको २६ औं महाधिवेशनअन्तर्गत केन्द्र, प्रदेश र जिल्लामा निर्वाचित इनरुवाका १२ जना पत्रकारहरुलाई इनरुवा नगरपालिकाका मेयर राजन मेहतासहित प्रमुख प्रशासकीय अधिकृत डिल्लीराज निरौलासहितले सम्मान गरेका छन् ।
इनरुवा नगरपालिकाले केन्द्र, प्रदेश र जिल्लातर्फ जित हात पार्ने इनरुवासहित आसपासको क्षेत्रलाई कार्यक्षेत्र बनाई पत्रकारिता गर्दै आएका पत्रकारहरुलाई सम्मान गरेको हो । सम्मानित हुनेहरुमा नेपाल पत्रकार महासंघका केन्द्रीय सदस्यतर्फ निर्वाचित इकवाल अहमद, १ नम्बर प्रदेशका सदस्यतर्फ प्रदेश सदस्य निर्वाचित प्रमोद यादव रहेका छन् ।
त्यसैगरी नेपाल पत्रकार महासंघ सुनसरी शाखातर्फ कोषाध्यक्ष पदमा निर्वाचित अजित झा, जिल्ला सदस्यहरुमा वीरेन्द्र साह, दीपेन्द्र यादव, निश्चल शर्मा र निर्विरोध निर्वाचित मिकाइल आलमलाई नगर प्रमुख मेहता, प्रमुख प्रशासकीय अधिकृत निरौला, नेपाली कांग्रेस इनरुवा नगर उपसभापति प्रदीप ढकालले संयुक्त रुपमा डायरी, कलम, दोसल्ला र अबिर लगाई सम्मान गरेका छन् ।
त्यसैगरी महासंघ सुनसरीबाट केन्द्रीय परिषद सदस्यतर्फ सुकदेव चौधरी निर्वाचित भएका छन् भने प्रदेश परिषद सदस्य समावेशीतर्फ अनवर अन्सारी र धीरेन्द्र चौधरी निर्विरोध निर्वाचित भएकालाई समेत सम्मान गरेका छन् । प्रदेश परिषद सदस्यतर्फ पिएमणि भट्टराई र चन्दन गुप्तालाई समेत सम्मान गरेका हुन् ।
कार्यक्रममा नेपाल प्रेस युनियन इनरुवाका सभापति टोमराज मेहताले निर्वाचनमा खेलेको भूमिकालाई मूल्याङ्कन गर्दै इनरुवा नगरपालिकाका नगर प्रमुख राजन मेहता, प्रमुख प्रशासकीय अधिकृत डिल्लीराज निरौलाले संयुक्त रुपमा डायरी, पेन र दोसल्ला ओढाई सम्मान गरेका थिए ।
