भण्टाबारी। कोसी गाउँपालिकाकाले हुलाकी राजमार्ग लक्षित तरकारी उत्पादन कार्यक्रमअन्तर्गत एक सय ३० जना किसानहरूलाई विभिन्न कृषि सामग्री वितरण गरेको छ ।
कृषि ज्ञान केन्द्र सुनसरीसँग सहकार्य गरेर कोसी गाउँपालिकाले किसानहरूलाई कृषि सामग्री वितरण गरेको हो । कोसी गाउँपालिका वार्ड नम्बर १ लौकहीस्थित कोसी सघन बाली क्लस्टर संचालक समितिले मंगलबार आयोजना गरेको कृषि औजार सार्वजनिकीकरण कार्यक्रममा कोसी गाउँपालिकाका अध्यक्ष ऐयुव अन्सारी, कृषि ज्ञान केन्द्र सुनसरीका प्रमुख नुनुलाल उराँवलगायतले किसानहरूलाई कृषि सामग्री हस्तान्तरण गरेका थिए ।
एक सय ३० जना किसानहरुलाई ब्रस, कटर, मोडमेल, बोरिङ, पम्पसेट, सेक्सन पाइप, घेराबेरा गर्ने पोल, पावर स्प्रेलगायत वितरण गरिएको कोसी गाउँपालिका अध्यक्षका स्वकीय सचिव धर्मेन्द्र विश्वासले जानकारी दिए ।
किसानहरूलाई आत्मनिर्भर बनाउन सहयोग पु¥याउने उद्देश्यले कृषि सामग्री वितरण गरिएको बताउँदै अध्यक्ष ऐयुव अन्सारीले क्रमबद्ध तवरले कोसीका किसानका खेतीयोग्य जग्गाबाट विभिन्न प्रकारका तरकारी बाली उत्पादन गरेर जीविका चलाउन सक्षम भएको बताए । किसानलाई आत्मनिर्भर बनाउँदै कोसी गाउँपालिकालाई कृषिको हब बनाउन आफूहरू लागेको उनको भनाइ छ ।
