इनरुवा । सुनसरीको इनरुवा नगरपालिकाका भित्र कोरोना संक्रमण दिनप्रतिदिन बढ्दै गइरहेको बेला पालिकाले नगर क्षेत्रमा अक्सिजन सहितको आइसोलेशन केन्द्र स्थापना कार्यलाई अन्तिम चरणमा पु¥याएको छ ।
बिहिवार आकस्मिक रुपमा डाकिएको सर्वदलिय बैठकमा इनरुवा नगरपालिकाले हेल्प डेस्क स्थापना गर्ने र नगर क्षेत्रमा कोरोना सम्वन्धित कुनै पनि समस्या आए नगरपालिकामा स्थापना भएको हेल्प डेस्कलाई जानकारी गराउने बितिकै सेवा प्रवाह गर्ने निर्णय गरिएको छ । नगर क्षेत्रभित्र कोरोनाका लक्षणहरु देखा पर्ने व्यक्तिलाई पीसीआर परीक्षण शुक्रवारदेखी पुनः सञ्चालन गर्ने समेत निर्णय गरेको छ ।
कोरोना रोकथाम र नियन्त्रण गर्नका लागि जनप्रतिनिधिहरुले दिनरात अहोरोत्र खटेपनि उपलब्धि मुलक सन्देश प्रवाह नभएकोले प्रत्येक दिन हेल्प डेस्कले जनताका समस्याहरु बारे गुनासाहरु सुन्ने र तत्काल समस्या समाधानका निम्ति भूमिका निर्वाह गरि जनतालाई चाहिएको सेवा सुविधा तथा उपचार तत्काल उपलब्ध गराउने तथा जनप्रतिनिधिहरुले दिनभर गरेका गतिविधिहरुलाई सञ्चारकर्मीहरुमाझ जानकारी गराउने भएको छ ।
पीसीआर परीक्षण गर्ने कार्यलाई बिशेष प्राथमिकताका साथ कामलाई अगाडी बढाउने इनरुवाका नगरप्रमुख राजन मेहताले बताए । जनताको साथमा रहदै आएको र कोरोना रोकथाम र नियन्त्रण गर्नका लागि आफू दिनरात अहोरात्र खटेको उनले बताए ।
कोरोना संक्रमित भएर घरमै बस्ने गरेको र जनप्रतिनिधिहरुलाई कुनै जानकारी नगरीकन उनीहरु आफनै इच्छाले बिभिन्न अस्पतालमा लैजाने गरेकोले समस्या आएको उनको तर्क छ । उनले नगरबासीलाई संक्रमण भए उपचारका निम्ति नगरपालिकासँग समन्वय गरे संक्रमितको उपचारमा सहजता ल्याउन कुनै कसर बाँकी नराख्ने प्रतिवद्धता समेत व्यक्त गरे ।
कोरोना संक्रमित भएका व्यक्तिहरुलाई कोभिड अस्पताल लैजानु पर्ने भएको खण्डमा आफूहरुलाई जानकारी गराए तत्काल उनीहरुलाई सबै व्यवस्था मिलाई दिने नगरप्रमुख मेहताको कथन छ । इनरुवा नगरपालिकामा अक्सिजनको अभाव नहुने दावी गर्दै नगरप्रमुख मेहताले जनतालाई चाहिने बितिकै आफूहरुले आइसोलेशन केन्द्रमा उपलब्ध गराउने प्रतिवद्धता व्यक्त गरेका छन् ।
इनरुवा नगरपालिकाकी उपप्रमुख जमुना गौतम पोखरेलले कोरोना महामारीको बेला आफूहरु जनतामाझ नै रहेको बताईन् । कोरोना संक्रमितहरुको घरघरमा पुग्ने गरेको बताउँदै उनले विषम परिस्थितीमा पनि जनताको समस्या बुझन घरघरमा पुग्ने कार्यलाई निरन्तरता दिएको बताईन् ।
नेपाल पत्रकार महासंघका केन्द्रीय सदस्य इकवाल अहमदले नगरपालिकाका जनप्रतिनिधिहरुले एक आपसमा समन्वयकारी भूमिका खेल्नुपर्नेमा जोड दिए । नगरबासीको हकहितमा नगरपालिका आलोपालो प्रणालीबाट भएपनि चौबिसै घण्टा जनताको समस्या समाधान गर्नका निम्ति उभिनुपर्नेमा उनले सुझाव दिए । नगरपालिकाले गरेका गतिविधिहरुलाई प्रत्येक दिन सार्वजनिक गर्नुपर्ने र कोरोना संक्रमण भएका व्यक्तिहरुको सवालमा नगरपालिका चनाखो हुनुपर्ने उनले बताए ।
नगरबासीका समस्या सुन्नका निम्ति र समाधानका निम्ति चौविसै घण्टा जनगुनासो सुन्नका लागि हेल्प डेस्क स्थापना गर्न समेत अहमदले सुझाएका थिए ।
नेपाली कांग्रेस सुनसरीका सचिव केदार भण्डारीले कोरोना महामारीको बेला जनप्रतिनिधिहरुले अहम भूमिका खेल्नुपर्ने बताए । कोरोना रोकथाम र नियन्यण गर्नका लागि सबै एकजुट भएर समस्या समाधान गर्न अग्रसर हुनुपर्ने बताउँदै नगरबासीको पीसीआर परीक्षण तत्काल सुरु गर्नुपर्ने उनले बताए ।
इनरुवा नगरपालिकाद्धारा हालसम्म ४०५ जनाको पीसीआर परीक्षण
इनरुवा नगरपालिकाले कोरोना रोकथाम र नियन्त्रणका लागि समुदाय स्तरमा कोरोना संक्रमित व्यक्तिहरुको पहिचान पीसीआर परीक्षण गरिएको सर्वदलिय बैठककमा प्रतिवेशन समेत प्रस्तुत गरिएको छ । बैशाखदेखी हालसम्म ४०५ जनाको पीसीआर गरिएको छ । त्यसमा एकसय ४८ जना महिला, २५७ जना पुरुष रहेका छन् । ५० जना महिला, ७४ जना पुरुषको पीसीआर रिपोर्टमा पोजेटिभ देखिएको छ । १०२ जनाको पीसीआर रिपोर्ट नगेटिभ देखिएको छ ।
जेठ ३ गते १०८ जना र जेठ ५ गते ८१ ज्नाको पीसीआर परीक्षण गरिएपनि उनीहरुको रिपोर्ट आउन नसकेको इनरुवा स्वास्थ्य शाखाले जनाएको छ ।
इनरुवाको कुन कुन ठाउँमा आइसोलेशन केन्द्र ?
इनरुवा नगर क्षेत्रमा अक्सिजन सहितको आइसोलेशन केन्द्र स्थापना गरेको छ । नयाँ बसपार्कको इनरुवा–४को भवनमा २० बेड, तोयानाथ नवर्दा खतिवडा बहुमुखी क्याम्पस इनरुवा–५ मा २० बेड, राजाजी रामजी दास माध्यमिक विद्यालय इनरुवा–२मा २० बेड, कर्वड हल, रंगशाला इनरुवा–१ मा १५ बेड र इनरुवा वडा नम्बर ३ मा १५ बेड सहितको आइसोलेशन केन्द्रहरुमा अक्सिजन, ऐम्बुलेन्स सेवा र बिरामीहरुलाई दैनिक प्रयोग गर्नका लागि चाहिने आवश्यक औषधी तथा सामग्रीहरुको सहितको सेवा सुविधा उपलब्ध गराएको नगरप्रमुख मेहताद्धारा हस्ताक्षरित प्रतिवेदनमा उल्लेख गरिएको छ ।
