इनरुवा । सुनसरीको सदरमुकाम समेत रहेको इनरुवा नगरपालिकामा कोरोना संक्रमणको संख्या बढ्दै गएपछि नगरक्षेत्रमा दुई सय ४३ जनाको पीसीआर परीक्षण गर्नका लागि स्वाव संकलन गरिएको छ । कोरोना संक्रमित भएर इनरुवा–२ साविक इनरुवा–८ मा एक युवकको मृत्यु भएपछि शुक्रवार इनरुवा नगरपालिकाले सो वडामा एक घर एक पीसीआर गर्ने अभियान अन्र्तगत दुई सय जनालाई पीसीआर परीक्षण गरिएको हो ।
इनरुवा–२ का जनप्रतिनिधिहरुको सक्रिय सहभागितमा सो वडाका सर्वसाधारणहरुको पीसीआर परीक्षण गर्नको लागि स्वाव संकलन गरिएको बताइएको छ । एक युवकको कोरोनाका कारण मृत्यु भएपछि इनरुवा–२ लाई सुनसरी प्रशासनले शिल गरिएको थियो ।
इनरुवा नगरपालिकामा हिजो बिहिवार सर्वदलिय बैठकमा नगरबासीको पीसीआर परीक्षण गर्ने निर्णयलाई कार्यान्वयन गर्दै शुक्रवार इनरुवा–२ र ९ नम्बर वडामा पीसीआर गरिएको छ ।
कोरोनासँग लक्षण मिल्दोजुल्दो रहेका व्यक्तिहरुलाई पहिलो प्राथमिकतामा राखेर शुक्रवार पीसीआर परीक्षण गरिएको इनरुवा स्वास्थ्य शाखाले जनाएको छ । इनरुवा–९ बवियामा ४३ जनाको पीसीआर परीक्षण गरिएको छ ।
इनरुवा–२ मा २ सय र इनरुवा–९ मा ४३ जना गरी जम्मा २ सय ४३ जनाको पीसीआर परीक्षणका लागि स्वाव संकलन गरिएको इनरुवा नगरपालिकाका स्वास्थ्य अधिकृत मिश्रीलाल मेहताले जानकारी दिए । जसमा महिला ७८ जना र पुरुष १ सय ६५ जना रहेका छन् ।
उनीहरुको स्वाव संकलन गरेर धरानको वीपी कोइराला स्वास्थ्य विज्ञान प्रतिष्ठान पठाइएको स्वास्थ्य अधिकृत मेहताले जानकारी दिए ।
इनरुवा नगरपालिका क्षेत्रभित्र कोरोनसँग मिल्दो लक्षण भएका व्यक्तिहरुको पता लगाउन प्रत्येक वडामा स्वास्थ्यकर्मीहरुको टोली परिचालन गरिएको छ । कोही कसैलाई कोरोनाको लक्षण देखा परेमा इनरुवा नगरपालिकाको स्वास्थ्य शाखामा सम्र्पक गर्न र अप्ठयारो परेको खण्डमा इनरुवाका जनप्रतिनिधिहरुलाई खबर गर्न सर्वसाधारणहरुलाई नगरपालिकाले अनुरोध गरेको छ ।
यता इनरुवा नगरपालिकाका मेयर राजन मेहता र उपमेयर जमुना गौतम पोखरेल संयुक्त रुपमा नगर क्षेत्रमा कोरोना संक्रमित भएर होम आइसोलेशनमा बसेको घरघरमा पुगेर स्वास्थ्य अवस्था बारे जानकारी लिएका थिए । उनीहरुको स्वास्थ्य अवस्था बुझदै आवश्यक पर्ने सामग्रीहरु पनि उपलब्ध गराउने प्रतिवद्धता व्यक्त गरेका थिए । तत्काल मेयर र उपमेयरले उनीहरुलाई स्वास्थ्य सामग्री उपलब्ध गराएका छन् ।
