इनरुवा । इनरुवा नगरपालिकाका मेयर राजन मेहताले जिल्ला अस्पताल इनरुवामा २० बेडको कोभिड अस्पताल दुईदिन भित्र सञ्चालनमा आउने बताएका छन् ।
इनरुवामा २० बेडको कोभिड अस्पताल सञ्चालन गर्न आवश्यक सामाग्री खरिद गरेर इनरुवातर्फ टोली प्रस्थान गरिसकेकोले दुईदिन भित्र कोभिड अस्पताल सञ्चालनमा आउने भएको हो ।
इनरुवाका मेयर मेहताले केही दिनअघि नै इनरुवामा कोभिड अस्पताल सञ्चालन गर्ने उद्घोष गरेपनि केही आवश्यक सामाग्रीको अभावले सञ्चालन गर्न कठिनाई भएकोले कोभिड अस्पताल सञ्चालन गर्न नसकेको बताए ।
इनरुवामा कोभिड अस्पताल संचालन गर्न आवश्यक सामाग्री खरिद गर्न बिरगंज पुगेको टोलीले चारदिनको अथक प्रयासपछि अक्सिजन सप्लाई लगायतका सामान लिएर इनरुवा लिएर आउदै छन् । भोलि आइतवारबाट जडान सुरू भई बढीमा दुईदिन भित्र इनरूवाको कोभिड अस्पताल संचालनमा आउने मेयर मेहताको कथन छ ।
कोरोना संक्रमितहरुलाई धरान र बिराटनगरको कोभिड अस्तपालमा रिफर गर्ने झन्झट हट्ने मेयर मेहताको भनाई छ । बिश्वभरी नै कोरोना महामारीको लहर चलेपछि समुदाय स्तरमा समेत कोरोना संक्रमणको संख्या बढ्दै गएपछि इनरुवा नगरपालिकाले चासो र चिन्ता राख्दै इनरुवामा कोभिड अस्पताललाई सञ्चालनको अब सम्पूर्ण तयारी पूरा भइसेकेको उनले बताए ।
इनरुवामा कोभिड अस्पताल सञ्चालन नभएकोले कोरोना संक्रमितहरुको ज्यान खतरामा रहेकोले आफूले अक्सिजन सप्लाई सहितका सामाग्री खरिद गर्नका लागि आरिफ हुसैन र स्वास्थ्य शाखाका सन्तोष देवलाई बिरगंज पठाएको बताए ।
टोलीको अथक प्रयासपछि चारदिन लगाएर बल्ल सो सामाग्री खरिद गरेर इनरुवा प्रस्थान गरिसकेकोले इनरुवाबासी लगायतका आसपास क्षेत्रका सर्वसाधारणहरुलाई सुविधा उपलब्ध हुने विश्वास व्यक्त गरेका छन् ।
कोरोना संक्रमितहरुको पहिचान गरी उनीहरुको उपचारमा आफूले सहयोग गर्ने उनले प्रतिवद्धता व्यक्त गरेका छन् । इनरुवा नगरपालिका भित्र बिभिन्न पाँच ठाउँमा अक्सिजन सहितको आइसोलेशन केन्द्र स्थापना गरिसकेका छन् ।
