इनरुवा । जिल्ला अस्पताल इनरुवा सुनसरीमा कोभिड अस्पताल सञ्चालन गर्नका लागि आवश्यक सामाग्री इनरुवा नगरपालिकाका नगरप्रमुख राजन मेहताले जिल्ला अस्पताल विकास समितिलाई हस्तान्तरण गरेको छ ।
जिल्ला अस्पताल इनरुवामा कोभिड अस्पताल सञ्चालन गर्नका लागि आवश्यक सामाग्रीको अभावका कारण सञ्चालन हुन नसकेपछि इनरुवा नगर प्रमुख मेहताको पहलमा सामाग्री उपलब्ध गराएर जिल्ला अस्पताल विकास समिति इनरुवाका अध्यक्ष गोपालराज भण्डारीलाई हस्तान्तरण गरेका हुन् ।
जिल्ला अस्पताल इनरुवामा २० बेडको कोभिड अस्पतालमा अक्सिजन सहितको सेवा सूचारु गर्न टेक्निसियनहरुले आजबाट काम सुरु गरेका छन् ।
इनरुवाका नगरप्रमुख राजन मेहता, इनरुवा नगरपालिकाका प्रमुख प्रशासकीय अधिकृत डिल्लीराज निरौला, स्वास्थ्य अधिकृत सन्तोष देव, स्वास्थ्य शाखाका निखिल पोखरेल,अस्पताल विकास समितिका अध्यक्ष भण्डारी, सदस्य तोया गिरी, नगरप्रमुखको स्वकीय सचिव सुनोज निरौला लगायतकाले अस्पतालको अवलोकन गरेका थिए ।
इनरुवा कोभिड अस्पतालमा दुईवटा आइसीयू बेडको समेत व्यवस्था गरिएको नगरप्रमुख मेहताले बताए । अक्सिजनको पाइप लगायतको सामाग्रीहरु जडान गर्ने काम टेक्निसियनहरुले सुरु गरेको उनले बताए । दुई वा तीनदिन भित्र उनीहरुले काम सक्ने बितिकै इनरुवा कोभिड अस्पतालमा कोरोना संक्रमितहरुलाई उपचार सुरु गर्ने उनले बताए ।
इनरुवा नगरपालिकाका नगरप्रमुख मेहता, प्रमुख प्रशासकीय अधिकृत निरौला लगायतकाले जिल्ला अस्पताल विकास समितिका अध्यक्ष भण्डारीलाई अक्सिजनका आवश्यक सामाग्रीहरु हस्तान्तरण गरेका थिए ।
इनरुवा नगरपालिकाका स्वास्थ्य अधिकृत सन्तोष देवको टोलीले चार दिनको अथक प्रयासपछि बिरगंजबाट अक्सिजनका आवश्यक सामाग्री उपलब्ध गराएर आज हस्तान्तरण गरेका छन् ।
नगरप्रमुख मेहताले कोरोना संक्रमणका लागि सरकारी गाडी दिएपछि अहिले साइकलमा आवतजावत गर्ने गरेका छन । आजपनि जिल्ला अस्पताल इनरुवामा नगरप्रमुख मेहताले साइकलमा चढेर अक्सिजनका आवश्यक सामाग्रीहरु हस्तान्तरण गर्न पुगेका थिए ।
