हरिनगर । सुनसरीको हरिनगर गाउँपालिका–१ मा सञ्चालनमा रहेको आइसोलेशन केन्द्रलाई आवश्यक पर्ने स्वास्थ्य सुरक्षा सामग्री १ नम्बर प्रदेश सरकारसँग माग गर्ने निर्णय गरेको हरिनगर गाउँपालिकाका अध्यक्ष गफार अन्सारीले बताएका छन् ।
हरिनगर गाउँपालिकामा मंगलवार बसेको चार पालिकाको संयुक्त बैठकले १ नम्बर प्रदेशको सामाजिक विकास मन्त्रालयसँग आवश्यक स्वास्थ्य सुरक्षा लगायतको सामग्री माग गर्ने निर्णय गरेको हो ।
हरिनगर–१ को भुटाहा जेनरल हस्पिटलमा सञ्चालनमा रहेको आइसोलेशन केन्द्रलाई थप प्रभावकारी बनाउन र सुधार गरी यस क्षेत्रको सुविधा सम्पन्न बनाउनका लागि आवश्यक पर्ने सामग्री प्रदेश १ सरकारसँग माग गर्ने निर्णय भएको पालिका अध्यक्ष अन्सारीले बताए ।
बर्जु, देवानगञ्ज, हरिनगर र भोक्राहा नरसिंह गाउँपालिकाका कोरोनाका बिरामीलाई उपचार गर्न सहज हुने उद्धेश्यले बीजी हस्पिटलको आइसोेलेशन केन्द्रलाई थप प्रभावकारी बनाउनका लागि आवश्यक सामग्री माग गर्नका लागि चारै पालिकाको संयुक्त बैठकले निर्णय गरी प्रदेश सरकारलाई पठाएको उनले बताए ।
बैठकले १ नम्बर प्रदेशको सामाजिक विकास मन्त्रालयसँग एक जना फिजिसियन, पीपीई सेट, मास्क, सेनिटाइजर, अक्सिजन सिलिन्डर, भेन्ट्रीलेटर, अक्सिजन कन्सनट्रेटर,भीटीएम तथा एन्टीजेन किड्स र आर्थिक सहयोग लगायतका बिषयमा चार पालिकाको संयुक्त बैठकले माग गरेको छ ।
चारवटै गाउँपालिकाको कोरोना संक्रमित बिरामीहरुलाई ल्याउन समस्या भएको र कोरोना संक्रमितहरुलाई प्रयोग गर्न एम्बुलेन्स नभएकोले १ नम्बर प्रदेशको सामाजिक विकास मन्त्रालयसँग तत्काल एक थान एम्बुलेन्स उपलब्ध गराईदिनका लागि माग गरेको छ ।
चारवटै पालिकाले पीसीआर परीक्षण गर्ने दायरा बढाउने र कोरोना संक्रमितहरुलाई हरिनगरको आइसोलेशन केन्द्रमा पठाउने गरी जनप्रतिनिधि र स्वास्थ्य प्रमुखहरुले भूमिका निर्वाह गर्ने समेत बैठकले निर्णय गरेको छ ।
आइसोलेशन केन्द्रलाई थप व्यवस्थापन गर्नका लागि चारवटै गाउँपालिकाले भूमिका निर्वाह गर्ने गरी जिम्मेवारी बहन गर्न सबै उतरदायी बन्न भोक्राहा नरसिंह गाउँपालिकाकी उपाध्यक्ष पुनम मेहताले आग्रह गरेकी थिईन् ।
सो बैठकमा कोरोनाको महामारीको बेला आ–आफनो क्षेत्रमा जनताको स्वास्थ्यमाथि खेलवाड नगरी जागरुक भएर चिन्ता र चासो राखेर कोरोना संक्रमितहरुको उपचारमा सहजता ल्याउनका लागि आइसोलेशन केन्द्रमा पठाउन सबैले भूमिका निर्वाह गर्नका लागि भोक्राहा नरसिंह गाउँपालिकाका प्रमुख प्रशासकीय अधिकृत रामचरित्र मेहताले जोड दिएका थिए ।
हरिनगर गाउँपालिकाका अध्यक्ष गफार अन्सारीको अध्यक्षतामा बैठक सम्पन्न भएको थियो । सो बैठकमा हरिनगरकी उपाध्यक्ष रिमझिम कुमारी भगत, निमित प्रमुख प्रशासकीय अधिकृत सुजन ढुङ्गेल, स्वास्थ्य प्रमुख प्रकाश थापा मगर, देवानगंजका प्रमुख प्रशासकीय अधिकृत चुडामणि गुरागाई, भोक्राहा नरसिंहकी उपाध्यक्ष पुनम मेहता, प्रमुख प्रशासकीय अधिकृत रामचरित्र मेहता, बर्जुका स्वास्थ्य प्रमुख रामबाबु श्रेष्ठ र सहसंयोजक दिलिप कुमार चौधरी लगायतको चारबटै स्वास्थ्य प्रमुखहरुको उपस्थिती रहेको थियो ।
–
