लौकही । सुनसरीको कोसी गाउँपालिकामा आवधिक योजना तथा मध्यकालीन खर्च संरचना कार्यशाला दुई दिने गोष्ठी सम्पन्न भएको छ ।
‘सुरक्षित कोसी दिगो पूर्वाधार, कृषि र पर्यटन समृद्धिको अधार’ भन्ने नारासहित कोसी गाउँपालिका पाँच वर्षीय सीमा आवधिक योजना तथा मध्यकालीन खर्च संरचनाको तयारीमा जुटेको छ ।
कोसी गाउँपालिकाले अगामी पाँच वर्षमा आवधिक योजना तथा मध्यकालीन खर्चसम्बन्धी अगामी दिनमा कसरी कार्य गर्नेबारेमा सरोकारवालासहित गाउँपालिकाका जनप्रतिनिधिसँगै कर्मचारीलाई सिकाइएको थियो ।
कोसी गाउँपालिकाका अध्यक्ष ऐयुब अन्सारीले कृषि र पर्यटन क्षेत्रलाई विशेष प्राथमिकतामा राखेर ‘सुरक्षित कोसी दिगो पूर्वाधार, कृषि र पर्यटन समृद्धिको अधार’ भन्ने नारा तय गरेको बताए ।
पालिकाका अध्यक्ष अन्सारीले निर्वाचित भएको चार वर्ष पूरा भएकाले अबको एक वर्षमा कृषि र पर्यटन क्षेत्रलाई बढी प्राथमिकतामा राखेर योजना तथा बजेट निर्माण गर्ने बताए ।
गोष्ठीलाई सम्बोधन गर्दै पालिकाका अध्यक्ष अन्सारीले कोसी गाउँपालिकामा रहेको कृषकहरुको तथ्याङ्क यकिन गरेर कृषि क्षेत्रमा कार्यक्रम लागू गरिनेसमेत उनले बताए ।
पालिकाभित्र रहेका किसानको तथ्याङ्क संकलन गरेर उनीहरुलाई अनुदानलगायत सेवासुविधा उपलब्ध गराउने उनले प्रतिबद्धतासमेत व्यक्त गरे ।
सीमा आवधिक योजना तथा मध्यकालीन खर्च संरचना कार्यशाला गोष्ठीलाई सम्बोधन गर्दै अध्यक्ष अन्सरीले पालिकाका कर्मचारी, वडाका कर्मचारी र जनप्रतिनिधिहरुले जनताको कामप्रति उत्तरदायी बन्न आग्रहसमेत गरे ।
जनप्रतिनिधिहरुको एक वर्ष कार्यकाल बाँकी रहेकाले चार वर्षमा गरेका काम जनतामा जानकारी गराउन उनले आग्रह गरे । जनताले मागेको कागजातहरु उपलब्ध गराउन र पारदर्शी ढङ्गबाट सबै कागजातहरु तयारी अवस्थामा राख्नसमेत अध्यक्ष अन्सारीले कर्मचारीलाई निर्देशन दिएका छन् ।
कोसी गाउँपालिकाभित्र कृषि र पर्यटन क्षेत्रलाई बढी प्राथमिकतामा राखेर योजना बनाउने र कार्यान्वयन गर्नका लागि सबैले साथ सहयोग दिनुपर्नेमा उनले जोड दिएका थिए ।
अगामी आर्थिक वर्षका लागि वार्षिक योजना तथा बजेट निर्माणको कार्य सुरु भइसकेको हुनाले यसै अवसरलाई आवधिक योजना निर्माणका लागि उपयोग गर्न मिल्ने अध्यक्ष अन्सारीको भनाइ छ ।
अगामी पाँच वर्षीय योजनाको रुपमा विकास कार्यक्रम तर्जुमा भई कार्यान्वयनमा ल्याउने उद्देश्यका साथ आवधिक योजना तथा गोष्ठी सम्पन्न गरेको आयोजकले जनाएको छ । सेन्टर फर सस्टेनेबल डेभलपमेन्ट स्टडिज प्रालिको परामर्श सहयोग र कोसी गाउँपालकाको आयोजनामा दुई दिने गोष्ठी सम्पन्न भएको हो ।
कार्यक्रममा कोसी गाउँपालिकाका अध्यक्ष ऐयुब अन्सारी, उपाध्यक्ष अनितादेवी यादव, प्रमुख प्रशासकीय अधिकृत खगेन्द्र गिरी, कार्यपालिका सदस्य, वडाध्यक्ष, कर्मचारी, समाजसेवी, बुद्धिजीवी, सञ्चारकर्मीलगायतको उपस्थिति रहेको थियो ।
