अजमल अन्सारी
सुनसरी । सुनसरीको गढी गाउँपालिका वडा नम्बर ३ का अध्यक्ष टुनालाल चौधरी र वडा सचिब सत्रुघन श्रेष्ठले लाखौं रुपैयाँको हिनामिना गरेको वडा सदस्य ललतीदेवी चौधरीले आरोप लगाउदै गढी गाउँपालिकामा निवेदन दिएकी छिन् ।
गाउँपालिकाको वडा नम्बर ३ मा चालु आर्थिक वर्ष ०७७÷०७८ को बजेटको बारेमा उनीहरुले आफूलाई चित्त बुझाउन नसकेको भन्दै गढी गाउँपालिकामा असार ८ गते मंगलवार निवेदन दर्ता गरि दर्ता नम्बर २२४३ रहेको वडा सदस्य चौधरीले जानकारी दिएकी छिन् ।
कोरोना भाइरस सम्बन्धि कार्यक्रम, प्रजनन स्वास्थ्य कार्यक्रम, पशु अवस्था ओषधी खरिद, पशु स्वास्थ्य शिविर संचालन कार्यक्रम, सरसफाइ कार्यक्रम, विभिन्न चाडपर्व कार्यक्रम खर्च, योजना अनुगमन तथा सुपरिवेक्षण लगायतका बजेटको शिर्षकबाट कार्यक्रम नगरि लाखौं रुपैयाँको हिनामिना गरेको वडा सदस्य चौधरीले आरोप लगाएकी छिन् ।
ईलाका प्रहरी कार्यालय मर्मत खर्च, अपाङ्गता भवन मर्मत संभार, राजाजी मन्दिर निर्माण वडा कार्यालय भवन मर्मत तथा बिजुलि व्यवस्थापन सुकुम्बासी बस्ती व्यवस्थापन लगायतका निर्माण कार्य नगरि वडाध्यक्ष र सचिवको मिलोमतोमा लाखौं रुपैयाँको हिनामिना गरेको वडा सदस्य चौधरीले बताएकी छिन् ।
वडामा विभिन्न बाटो मर्मतका बजेट समेत मर्मत कार्य नगरि हिनामिना गरेको भन्दै वडामा अहिले वर्षाले गर्दा विभिन्न बाटोमा हिलाम्मे हुँदा आवातजावतमा कठिनाई हुने गरेको, बाटोमा खाल्डाखुल्डी भएकोले सर्वसाधारणलाई आवतजावत गर्न समस्या भएको वडा सदस्य चौधरीले बताईन् ।
उक्त शिर्षकहरुको बजेट कहाँ , कसरी, कुन ठाँउमा खर्च भयो भन्ने जानकारी माग्दा समेत हिसाब नदिएको भन्दै वडा अध्यक्ष तथा वडा सचिबलाई नेपाल सरकारको नियम बमोजिम उनले कानुनी कार्वाहीको माग गरेकी छिन् ।
गरिब निमुखा जनताहरुको निम्ति गाउँपालिकाले हरेक वडामा ईन्टरनेट जडान गरेतापनि अनलाइन सेवा,जन्म दर्ता, विवाह दर्ता, मृत्यु दर्ता तथा बसाइँसराइको फर्म वडाको मातहतमा भएतापनि वडा सचिब, वडा अध्यक्षले वडा कार्यालयमा नगरीकन बाहिरको पसलमा फर्म भराउन पठाउने गरेको समेत उनले आरोप लगाईन् ।
यस वडामा भइरहेको भ्रष्टाचारी, वडा अध्यक्ष तथा वडा सचिब गरेको हिनामिना लगायत जनतालाई दुख दिने कामले आफुलाइ यस वडाको जनप्रतिनिधि पनि भन्न लाज लाग्न थालेकी उनको भनाई छ ।
स्थानीय युवाहरुले आक्रोश पोख्दै भने, ‘गाउँपालिका तथा वडामा बढ्दो भ्रष्टाचारलाई न्यूनीकरण गर्नु पर्छ ।’ वडाध्यक्ष र सचिव नसचिए आफूहरु वडा कार्यालयमा तालावन्दी सहित चरणवद्ध आन्दोलन गर्न बाध्य हुने युवाहरुले चेतावनी समेत दिएका छन् ।
वडाध्यक्ष टुनालाल चौधरीले आफुले कुनै पनि अनिमियतता नगरेको बताए ।
आफूमाथि आरोप मात्रै लगाउन खोजेको उनले बताए । आफूमाथि लगाइएको आरोप निराधार भएको वडाध्यक्ष चौधरीले प्रतिक्रिया दिए । आफू जनप्रतिनिधि भएपछि सधै जनताको साथमा रहेको र विकास निर्माण कार्यमा निरन्तर लागि परेको वडाध्यक्ष चौधरीको भनाई छ ।
यता वडा सचिब सत्रुघन श्रेष्ठले आफुहरुहरु माथी लगाएको आरोप झुठो रहेको भन्दै आफुहरु विभिन्न किसिमको कार्यक्रमहरु गरेको प्रमाण सहित राखेको प्रतिक्रिया दिए ।
