इनरुवा । नेपाली काँग्रेस सुनसरीका सचिव केदार भण्डारीले नेपाली काँग्रेसको आसन्न १४ औं अधिवेशनमा सुनसरी कांग्रेसको सभापति पदमा उम्मेद्वारी घोषणा गरेका छन् ।
नेपाली काँग्रेस केन्द्रीय कार्य समितिले महाधिवेशनको परिमार्जित कार्यतालिका अनुमोदन गरेसँगै सुनसरी जिल्लाको भावी नेतृत्वका लागि हाल जिल्ला सचिवको भुमिकामा रहेको भण्डारीले सभापति पदमा आफ्नो उम्मेद्वारी फेसबुक मार्फत घोषणा गरेका छन ।
नेपालको सबैभन्दा पुरानो र गौरवशाली पार्टीको कार्यकर्ता भएर वर्षौ सेवा गर्न पाउनु आफ्नो अहोभाग्य भएको उल्लेख गर्दै भण्डारीले सुनसरी जिल्लाको काँग्रेस सचिवको रुपमा आफुलाई दिईएको भुमिकाको मुल्यांकन गर्दै आगामी दिनहरुमा समेत आफुलाई मार्गदर्शन हुनेमा विश्वस्त रहेको उल्लेख गर्दै उम्मेदवारी घोषणा गरेका छन ।
कानुन ब्यवसायि समेत रहेका भण्डारीले नेपाली काँग्रेसको १४ औं महाधिवेशनमा सुनसरी कांग्रेसको सभापति पदमा फेसबुक मार्फत उम्मेदवारी दिने घोषणा गरेपछि उनको चर्चा हुन थालेको छ । सुनसरी कांग्रेसको नेतृत्व गर्दै गर्दा सबैलाई सहयोग गरेकोले आसन्न १४ औं महाधिवेशनमा सहयोग गर्न सबैलाई उनले अपील समेत गरेका छन् ।
नेपाली काँग्रेसको राजनीतिमा लामो समयदेखि क्रियाशिल भण्डारीले नेपाली काँग्रेस सुनसरीको दुई कार्यकाल निर्वाचित सचिवको भुमिका निर्वाह गरिसकेका छन् । विद्यार्थी राजनीतिबाट उदाएर आफ्नो उर्जाशील जीवन नेपाली काँग्रेसको संगठनमा सर्मपित गरेका भण्डारी सुनसरी काँग्रेसमा सालिन, भद्र र बौद्धिक नेताको रुपमा गनिन्छन् ।
पेशाले अधिवक्ता समेत रहेका भण्डारी नेपाल बार एसोसिएसनको केन्द्रीय उपाध्यक्ष र सुनसरी बारको अध्यक्षको भुमिका समेत निर्वाह गरिसकेका छन । सुनसरी काँग्रेसमा तल्लो तहका कार्यकर्तासँग प्रत्यक्ष पहुँच तथा सम्पर्क भएका नेता हुन ।
सुनसरीमा वर्तमान सभापति राजीव कोईरालाको नेतृत्वमा नेपाली काँग्रेसलाई पहिलो पार्टी बनाउन महत्वपुर्ण भुमिका खेलेका भण्डारीलाई सुनसरी काँग्रेसको भावी सभापतिको बलियो दाबेदारको रुपमा हेर्न थालिएको छ ।
भण्डारीले फेसबुक मार्फत सुनसरी कांग्रेसको सभापति पदमा उम्मेदवारी घोषणा गरेपछि सुनसरीको उनको चर्चा हुनथालेपछि कांग्रेसको मजबुत उम्मेदवारका रुपमा रहेका कांग्रेसी नेताहरु बताउँछन् ।
कांग्रेसको कोइराला खेमाबाट उनको उम्मेदवारी आएको चर्चा कांग्रेसजनमा छ । उनको विपक्षमा कांग्रेसबाटै पार्टीका केन्द्रीय सभापति शेरबहादुर देउवा निकट मानिएका वर्तमान सुनसरी कांग्रेस उपसभापति सञ्जय श्रेष्ठको समेत उम्मेदवारी आउने पक्कापक्की छ ।
