इनरुवा । नेपाल प्रहरी जनपथ प्रहरी रहेकोले सुनसरी प्रहरीलाई जनमैत्री प्रहरी बनाउने आफ्नो पहिलो अभियान हुने सुनसरीमा भर्खरै आएका प्रहरी प्रमुख संजयसिंह थापाले बताएका छन् ।
तीन दिन अघि सुनसरीबाट सरुवा भई गएका प्रहरी उपरीक्षक कमल थापा गएसँगै हिजो बुधवार सुनसरी प्रहरीको जिम्मेवारी सम्हाल्न आइपुगेका प्रहरी उपरीक्षक संजयसिंह थापाले जनमैत्री प्रहरी सेवा र पूर्ण सुरक्षा व्यवस्थाको मजबुती आफ्नो कार्यकालको मुख्य जिम्मेवारी रहने बताएका छन् ।
सुनसरी अनलाइनसँग हिजो साझ कुरा गर्दै थापाले काउन्टर पार्टस अर्थात सीमा पारीका भारतीय सुरक्षा संयत्रसँग समन्वय गर्दै सीमा क्षेत्रको समस्याहरुको समाधानका निम्ति आफू गम्भिर भएर लाग्ने बताउँदै उनले मुस्कान सहितको प्रहरी सेवा आफ्नो संगठनको मुलमन्त्र नै रहेकोले सुनसरीभरी प्रहरी सेवामा यसलाई लागू गराउन कुनै कसर बाँकी नराख्ने प्रतिवद्धता समेत उनले व्यक्त गरे ।
एक अर्कोप्रसंगमा एसपी थापाले सुनसरी जिल्लाको लागू औषध ओसार पोसार र र्दुव्यसन मुख्य समस्या रहेको आफूले थाहा पाएको र यसलाई नियन्त्रण गर्न सुनसरी प्रहरी सक्रिय भएर लाग्ने बताउँदै उनले र्दुव्यसनीको हकमा पुर्नस्थापनाका लागि समेत जिल्लामा अभियान चलाइने बताए ।
उनले आफू यस जिल्लाका लागि नयाँ नभएपनि प्रहरीको जिल्ला प्रमुखको जिम्मेवारीमा नयाँ रहेका कारण सबै सरोकारवाला, संस्था, सरकारी तथा गैरसरकारी निकाय, संचारकर्मी, नागरिक समाज लगायत सबैमा सल्लाह सुझावका लागि आग्रह गर्दै आफ्नो कार्यकालमा सुनसरी जिल्लाको सुरक्षा व्यवस्थाका लागि नम्बर वन बनाउने प्रतिवद्धता समेत व्यक्त गरे ।
सुनसरीका प्रहरी प्रमुख कमल थापाको काठमाडौं उपत्यका प्रहरी कार्यालय तालिम अन्वेषण विकास तथा समन्वय शाखा रानीपोखरी सरुवा भएपछि उनको स्थानमा संजयसिंह थापा सुनसरीको नयाँ प्रहरी प्रमुखको जिम्मेवारी पाएका हुन् ।
जिल्ला प्रहरी कार्यालय सुनसरीको प्रमुख भएर बुधबार हाजिर भएका उनी अख्तियर दुरुपयोग अनुसन्धान आयोगको केन्द्रिय कार्यालय प्रहरी महाशाखा टंगाल काठमाडौमा कार्यरत थिए ।
