इनरुवा । सुरक्षित आप्रवासन परियोजना सामीले मंगलवार एक कार्यक्रम गरेर प्रतिवेदन सार्वजनिक गरेको छ ।
इनरुवा नगरपालिका, सामी र हेल्भेटासको सहयोगमा सञ्चालित सामी परियोजनाले गरेका गतिविधिहरुको बारेमा पत्रकार सम्मेलन गरी प्रतिवेदन सार्वजनिक गरेका हुन् ।
२०१५ जनवरीदेखी २०२१ जुन ३० सम्म आप्रवासी श्रोत केन्द्रमा दर्ता र सफल भएका उजुरी लगायतका विषयमा प्रतिवेदन सार्वजनिक गरेका हुन् ।
सुरक्षित आप्रवासन परियोजना सामीले पत्रकारहरुसँगको एक दिने अन्तरक्रियामा वैदेशिक रोजगारीको अवस्था, असर, चुनौती र वैदेशिक रोजगारीले निम्त्याएको सामाजिक असरले महिला तथा पुरुषमा मानसिक तनावका विषयमा समेत पत्रकारहरुलाई जानकारी गराएको थियो ।
आप्रवासी श्रोत केन्द्र सुनसरीमा दर्ताको भएको उजुरी एक हजार दुई ४७ र आठ सय ७६ मुद्धामा सफल भएको छ । यसमा बिभिन्न प्रकृतिका मुद्धाहरुको बारेमा उजुरी दर्ता भएका थिए ।
२०१५ जनवरीदेखी २०२१ जुन ३० सम्म आप्रवासी श्रोत केन्द्र सुनसरीमा परेको उजुरीको अधारमा क्षतिपूर्ती समेत दिलाउन सफल भएको सामीले जनाएको छ । आप्रवासी श्रोत केन्द्रबाट दुई करोड ४२ लाख ९५ हजार, पिपुल फोरमबाट २७ लाख ५५ हजार, पीएनसीसी मार्फत आठ लाख १८ हजार, मृत्यु सम्वन्धमा क्षतिपूर्ती पाँच करोड ९८ लाख ५७ हजार एक सय ५० रुपैयाँ गरी आठ करोड ७६ लाख ३९ हजार ६ हजार ५० रुपैयाँ बराबरको पीडित परिवारलाई क्षतिपूर्ती दिलाउन सफल भएको प्रतिवेदनमा उल्लेख गरिएको छ ।
आप्रवासी श्रोत केन्द्रमा दर्ता भएका उजुरी मध्ये सफल गराउन सहयोगी निकायहरुले भूमिका निर्वाह गरेका छन् । सहयोगी संस्थाहरु आप्रवासी श्रोत केन्द्रबाट पाँच सय ९६, स्थानीय स्तरको पहलबाट ४२, प्रहरी कार्यालयको सहयोगमा ९७, पीएनसीसीको सहयोगमा ८४, पिपुल फोरमको सहयोगमा ५०, श्रम कार्यालय प्रदेश नम्बर १ को सहयोगमा ०७ गरी जम्मा ८७६ वटा मुद्धाहरु सफल भएका छन् । २०२० जुलाई १६ देखी २०२१ जुलाई ५ सम्म पुरुष २२१७ जना र महिला २९० जना गरी २५०७ जनाले आप्रवासी श्रोत केन्द्र सुनसरीमा सूचना लिन आएका छन् ।
सामी परियोजनाका जिल्ला अधिकृत देव नारायण चौधरी र कार्यक्रम संयोजक धिरज भट्टराईले सहजीकरण गरेका थिए । इनरुवाका डेढ दर्जन बढी संचारकर्मीहरुको सहभागिता रहेको थियो ।
