हरिनगर। सुनसरीको हरिनगर गाउँपालिका–४ को वडा कार्यालयदेखि दक्षिणको बाटो हिलाम्ये भएपछि विरोधस्वरुप सडकमै स्थानीयले धान रोपेका छन् ।
हालको हरिनगर गाउँपालिका वडा नम्बर–४ र साविकको वडा नम्बर–८ को बाटोमा मर्मत सम्भार नगरेपछि स्थानीयलाई आवतजावत गर्न समस्या भएपछि त्यहाँका स्थानीयले विरोध गर्दै हिलाम्ये बाटोमा नै धान रोपेका छन् ।
केही दिनदेखि परेको अविरल वर्षाका कारण हाल हरिनगर–४ र साविकको ८ नम्बर वडाका स्थानीयले वडा कार्यालयका जनप्रतिनिधिलाई पटकपटक मर्मत सम्भार गर्न अनुरोध गरे पनि वास्ता नगरेको स्थानीय बताउँछन् ।
खाल्डोमा पानी जमेको र हिलाम्ये बाटोका कारण आवतजावत गर्न समस्या भएपछि सडकमै धान रोप्दै एक घण्टाभन्दा बढी वडाबासीले सडक अवरोध गरेका थिए ।
वडामा मर्मत सम्भार गर्ने बजेट भए पनि हरिनगर–४ का वडाध्यक्ष सुदिलाल मेहता सहितका जनप्रतिनिधिले बेवास्ता गरेका कारण सर्वसाधारणले सास्ती खेप्दै आउँदै गरेको बौवालाल मेहताले बताए ।
स्थानीय नेता तथा समाजसेवी देवनारायण मेहताले वडा कार्यालयको लापरवाहीका कारण वर्षा मौसममा सडकको अवस्था जर्जर भएको बताए । वडा कार्यालय तत्काल मर्मत सम्भार गर्ने व्यवस्था मिलाउनु पर्ने उनीहरुले माग गरेका छन् ।
जनप्रतिनिधिले अनियमिततासमेत गरेकाले वडाबासीले एकएक हिसाब लिनेसमेत उनले बताए । यता हरिनगर–४ का वडा सदस्य राजेशकुमार पालले गिट्टी लिएर तीन वटा टिपर हिलाम्ये बाटोमा झार्न जाँदा स्थानीयले लखेटेर भगाएकाले समयमा काम गर्न नसकिएको बताए । मर्मत सम्भार कोटेसनबाट काम गर्ने भएकाले वडा कार्यालयको कुनै दोष नरहेको र अनियमिततासमेत नगरेको उनले बताए ।
