इनरुवा । सुनसरीको इनरुवा नगरपालिका क्षेत्रभित्र कार्यरत रहेका बाल विकास सहयोगी कार्यकर्ता(बाल शिक्षक) हरुले नगरपालिकामा बिभिन्न माग राख्दै बिहिवार धर्ना दिएका छन् ।
सहयोगी कार्यकर्ताहरुको संघीय सरकारबाट आठ हजार र स्थानीय सरकारबाट सात हजार गरी १५ हजार तलब दिने गरी बजेट भाषणबाट घोषणा गरेको हुदाँ इनरुवा नगरपालिकाले पनि ७ हजारको व्यवस्था कार्यपालिकाबाट निर्णय गर्नुपर्ने माग राख्दै धर्ना दिएका हुन् ।
इनरुवा नगरपालिकामा नारा जुलुस गर्दै बिहिवार दिनभर नगर प्रमुख राजन मेहताको कार्यकक्ष प्रवेश गर्ने मुख्य गेट अगाडी धर्ना दिएका थिए । इनरुवा नगरपालिकाले सात हजार तलब कार्यपालिकाबाट निर्णय नभएसम्म आन्दोलनमा उत्रने समेत चेतावनी दिएका छन् ।
आन्दोलित बाल शिक्षकहरुले न्यूनतम पारिश्रमिक १३ हजार पाँच सय तोकिएपनि आफूहरुले हालसम्म नपाएको गुनासो गर्दै सरकारले श्रम शोषण गरेको बताएका छन् ।
आफूहरुको पक्षमा पालिकाले निर्णय नगरेसम्म कडा रुपमा प्रस्तुत हुने चेतावनी दिदै सात हजार तलब दिनुपर्ने अडान सहित नगरपालिकामा धर्ना दिएका थिए ।
इनरुवाका नगर प्रमुख राजन मेहताले आन्दोलित सहयोगी कार्यकर्ता(बाल शिक्षक) हरुलाई सभाकक्षमा लगेर उठाएको मागप्रति सकारात्मक रहेको बताए ।
उनीहरुको कार्यगत मूल्याङ्कन गरेर छुट्टै समिति बनाएर राज्यले दिएको सेवा सुविधा दिन आफू तयार रहेको उनले बताए । परिषदको उद्घाटन मात्रै भएकोले परिषदबाट पनि मागलाई सम्वोेधन गर्ने नगर प्रमुख मेहताको भनाई छ ।
