इनरुवा । केही दिन अघि जिल्ला प्रहरी कार्यालयमा प्रहरी उपरीक्षकका रुपमा आउनु भएका संजय सिंह थापाले सुनसरीमा जनतासँग प्रहरीको सम्वन्ध सुदृढ हुने बताए ।
जिल्ला प्रहरी कार्यालय सुनसरीमा आयोजित पत्रकार सम्मलेनमा बोल्दै सुनसरीका प्रहरी उपरीक्षक थापाले सुनसरीमा बिचौलियाको कुनै कुरा नचल्ने बताउँदै सिधा जनताको पहुँच प्रहरीसँग हुने बताए ।
सुनसरीबाट बिदाई भएर गएका प्रहरी उपरीक्षक कमल थापाको सकारात्मक कुरालाई आत्मसाथ गर्दै लागु औषध कारोवारलाई न्यूनीकरण गर्दै लागु औषधबाट हुने अपराधिक क्रियाकपाललाई न्युनीकरणमा जोड दिने उनले बताए ।
भारतसँग खुल्ला सीमाका कारण सीमावर्ती क्षेत्रमा हुँदै आएको अपराधीक गतिविधि, लागूऔषध नियन्त्रणमा र चोरी तस्करी नियन्त्रणमा कडा रुपमा प्रस्तुत हुने जिकिर समेत उनले गरे ।
नेपाल पत्रकार महासंघ सुनसरीका सदस्य मिकाइल आलमले सूचना,समन्वय र सुरक्षाका सवालमा गम्भिर भएर लाग्न सुझाव समेत दिएका थिए । जिल्लामा शान्ति सुरक्षा,लागूऔषध नियन्त्रण तथा चोरी तस्करी नियन्त्रणमा लाग्ने प्रहरी उपरीक्षक थापाको भनाई छ ।
बिचौलियाहरुको पहिचान गरी लिस्ट तयार पार्ने उनले बताउँदै सुनसरी प्रहरीमा जनताको पहुँच प्रहरीसँग हुने वातावरण तयार पार्ने बताए ।
‘नेपाल प्रहरीलाई जनअपेक्षा अनुसार काम गर्ने वातावरण बनाई अपराध रहित समाज निर्माण गर्नु मेरो मुख्य उद्देश्य हो,’ उनले भने, ‘आफ्नो कार्यकालभरी अपराध नियन्त्रणमा लागि पर्नेछु ।’
काउन्टर पार्टससँग समन्वय र सहकार्य गरी काम गर्ने तथा सुनसरीका प्रमुख जिल्ला अधिकारी उमेश कुमार ढकालसँग छलफल गरी सुनसरीका पत्रकारहरुलाई पनि काउन्टर पार्टसको बैठकमा सहभागि गराउनका आफू पहल गर्ने उनले बताए ।
