इनरुवा । सर्वोच्च अदालतले संसद् पुनःस्थापना फैसला गरेपछि इनरुवामा दीप प्रज्वलन गरेको छ । सुनसरीको इनरुवामा संसद् पुनःस्थापनाको अवसरमा दीप प्रज्वलन गरेको हो ।
वर्तमान केपी शर्मा ओलीको नेतृत्व सरकारले दोश्रो पटक संसद् विघटन गरेको विषयमा सोमबार सर्वोच्च अदालतले दोश्रो पटक पनि संसद् पुनःस्थापना गरेको फैसला सुनाएपछि इनरुवा लगायत आसपासका क्षेत्रमा दीप प्रज्वलन गरी सर्वोच्च अदालतको फैसलालाई स्वागत गरेका हुन् ।
इनरुवामा नेपाली कांग्रेस, नेकपा एमाले माधव नेपाल समुह, नेकपा माओवादी केन्द्र लगायतका गठवन्धनका नेताहरुले दीप प्रज्वलन गर्दै सर्वोच्च अदालतको फैसलालाई स्वागत गरेका छन् ।
दीप प्रज्वलन कार्यक्रमलाई सम्बोधन गर्दै संघीय सांसद् सीताराम मेहताले वर्तमान सरकारले चालेको कदम असंवैधानिक, अलोकतान्त्रिक र सर्वसत्तावाद भएकाले सर्वोच्च अदालतले संविधानको रक्षाका लागि दोश्रो पटक पनि संसद् पुनःस्थापनाको पक्षमा फैसला सुनाएकोले निर्णयलाई स्वागत गरेको बताए ।
न्यायालयले जनताको भरोसालाई कायम गरेको र संविधान रक्षाका लागि सर्वोच्च अदालतले गरेको निर्णय स्वागतयोग्य भएको बताउँदै संघीय सांसद् मेहताले वर्तमान सरकारको रवैयाका कारण सर्वोच्च अदालतको सही समयमा फैसला गरेकाले आमजनताको न्यायालयप्रतिको विश्वास बढेको बताए ।
सर्वोच्च अदालतले गरेको फैसलाले नेपाली कांग्रेसको सभापति शेरबहादुर देउवालाई प्रधानमन्त्री बनाउन परमादेश पनि जारी भएकाले अबको प्रधानमन्त्रीले देश र जनताको लागि काम गर्नेसमेत उनले बताए ।
‘संसद पुनःस्थापना भएको जीत समग्र नेपालीको जीत हो,’ उनले भने, ‘वर्तमान केपी शर्मा ओलीको नेतृत्व सरकारले संघीय गणतन्त्र लोकतन्त्रबाट प्राप्त भएको संविधानलाई ध्वस्त पार्ने योजना असफल भएको छ ।’
यसैगरी इनरुवा नगरपालिकाका नगरप्रमुख तथा नेपाली कांग्रेस इनरुवा नगरका सभापति राजन मेहताले वर्तमान सरकार तानाशाही बनेकोमा सर्वोच्च अदालतको निर्णयले त्यसलाई अन्त्य गरेको बताए ।
सकारात्मक निर्णयलाई स्वागत गर्दै अबको दिनमा सहकार्य, समन्वय र एकता गरेर अगाडि बढ्नुपर्नेमा उनले जोड दिएका थिए । अबको प्रधानमन्त्री नेपाली कांग्रेसका सभापति शेरबहादुर देउवाले सुशासन कायम गरी सरकारको नेतृत्व गर्नुपर्ने नगर सभापति मेहताले बताए ।
नेपाली कांग्रेस सुनसरीका उपसभापति हरिलाल मेहताले सर्वोच्चको फैसलालाई स्वागत गर्दै इनरुवाको लोकतान्त्रिक चोकमा दीप प्रज्वलन गरेर खुसी मनाएको बताए ।
त्यसैगरी नेकपा माओवादी केन्द्रकी इनरुवा नगर संयोजक तोया गिरी (पौदार) ले सर्वोच्च अदालतको फैसला स्वाग्तयोग्य रहेको बताइन् । प्रतिगमनकारीहरुको परास्त भएकाले नेपाली जनताको ऐतिहासिक जीत भएको गिरीले बताइन् । संघीय लोकतान्त्रिक गणतन्त्र संविधानको रक्षा भएको उनको ठहर छ ।
