इनरुवा । सुनसरीको बर्जु गाउँपालिका–१ मा नागरिक नाटय कला केन्द्रको दुइ तल्ले भवनको शिलान्यास गरेकोे छ ।
बर्जु गाउँपालिकाका अध्यक्ष रघुनन्दन चौधरीले नागरिक नाटय कला केन्द्रको दुइ तल्ले भवनको शिलान्यास गरेको हो ।
बर्जु गाउँपालिकामा पहिलो पटक नागरिक नाटय कला केन्द्रका युवाहरुको सक्रियतामा गाउँपालिकाको सात लाख र केन्द्रको एक लाख गरी आठ लाख बराबरको बजेटमा दुई कठ्ठा जग्गामा दुई तल्ले भवन निर्माण कार्य सुरु भएको छ ।
नागरिक नाटय कला केन्द्र बर्जु–१ मा मंगलवार एक कार्यक्रमका बीच गाउँपालिका अध्यक्ष चौधरीले शिलान्यास गरेका हुन् ।
शिलान्यास कार्यक्रमको प्रमुख अतिथि समेत रहेका पालिकाका अध्यक्ष रघुनन्दन चौधरीले पालिकाभित्र पहिलो पटक युवाहरुको पहलमा भवन निर्माण कार्य सुरु भएको बताए । उनले भने, ‘कला, संस्कृति र संस्कारको जर्गेना गर्नु हामी सबैको जिम्मेवारी हो ।’ नागरिक नाटय कला केन्द्रले बर्जुका सबै जातजातिको कला,संस्कृति र संस्कारको संरक्षण गर्दै जर्गेनामा सहयोग पुग्ने छ ।
बर्जुको पहिचानलाई नाटय कला केन्द्र मार्फत सचेतना जगाउँदै युवाहरुको सकारात्मक पहलमा आफूहरुले सहयोग गरेको बताए ।
गाउँपालिकाको एकल प्रयासले मात्र हुँदैन यस कार्यमा सबैको सहयोगको आवश्यकताले मात्र सफल हुने उनको जिकिर छ । यस पालिकाका कलाकारहरुलाई प्रोत्साहन र मनोवल बढाउनका लागि पालिकाले हातेमालो गरेको समेत उनले बताए ।
बर्जु गाउँपालिकामा प्रतिभा भएका युवाहरुलाई अगाडि बढाउनु मेरो कर्तव्य भएकोले पालिकाको सम्पतिको रुपमा उनीहरुलाई संरक्षण गर्नु आवश्यक रहेको उनको कथन छ ।
शिलान्यास कार्यक्रममा बर्जु–१ का वडाध्यक्ष श्यामकुमार गुरुङ्ग, नेपाली कांग्रेसका लातुराम गच्छदार, नेकपा एमाले बर्जुका अध्यक्ष दिल कुमार गुरुङ्ग लगायतकाले नागरिक नाटय कला केन्द्रले कलाकार उत्पादन गर्नुपर्ने र यस क्षेत्रलाई पेशा बनाई आफनो जीविकोपार्जन गर्न सक्ने तथा आत्मनिर्भर बनाउन सबैको प्रयास हुनुपर्नेमा जोड दिएका थिए ।
नागरिक नाटय कला केन्द्र बर्जुका अध्यक्ष जितेन्द्र सरदारको अध्यक्षमा कार्यक्रम सम्पन्न भएको थियो भने कार्यक्रम मनोज मेहताले संचालन गरेका थिए ।
