हरिनगर । सुनसरीको हरिनगर गाउँपालिकालाई नगरपालिका बनाउने प्रयासमा लागेको हरिनगर गाउँपालिकाका अध्यक्ष गफार अन्सारीले बताएका छन् ।
हरिनगर गाउँपालिकालाई नगरपालिका बनाउन आफू लागि परेको अध्यक्ष अन्सारीले सञ्चारकर्मीहरुलाई बताएका हुन् ।
स्थानीय तहको निर्वाचनमा हरिनगरा, रामनगर भुटाहा, गौतमपुर, बसन्तपुर र घुस्की गाउँ विकास समितिलाई हरिनगर गाउँपालिकामा परिणत भई हरिनगर गाउँपालिका भएको हो ।
पालिका भएसँगै स्थानीय तहको निर्वाचनमा नेपाली कांग्रेसबाट टिकट पाएर हरिनगर गाउँपालिकाको अध्यक्ष पदमा गफार अन्सारी भारी मतले बिजयी भएर अहिले बागडोर सम्हाल्दै आएका सफल जनप्रतिनिधिका रुपमा परिचित भएका छन् ।
हरिनगर गाउँपालिकालाई नगरपालिकामा परिणत गर्न सबै मापदण्ड पुरा भइसकेकोले पालिकाका अध्यक्ष अन्सारीले गाउँपालिकालाई नगरपालिका बनाउने प्रयासमा जुटेको उनको कथन छ ।
सो गाउँपालिकामा जनसंख्या, शिक्षा, स्वास्थ्य र पूर्वाधारका सबै मापदण्ड पुरा भइसकेकोले आउने निर्वाचनसम्ममा नगरपालिका बनाएर छाड्ने अठोट लिएका पालिका अध्यक्ष अन्सारीले नगरपालिकाको प्रक्रिया सुरु गरेको बताए ।
हरिनगर गाउँपालिकाको आठौं गाउँ सभा समापन कार्यक्रममा हरिनगर गाउँपालिकालाई नगरपालिकामा परिणत गर्न अध्यक्ष अन्सारीले प्रस्ताव लैजाने क्रममा सबैले ताली बजाएर प्रस्ताव पारित गरेका थिए । एक वर्षपछि हुने स्थानिय तहको निर्वाचनमा नगरपालिका हुनेमा कुनै शंका नरहेको अध्यक्ष अन्सारीको भनाई छ ।
हरिनगर गाउँपालिकाको वडा नम्बर–३ हरिनगरा र ४ नम्बर वडा गौतमपुरलाई जोगाउनका लागि नगरपालिकाको अवधारणा ल्याएको अध्यक्ष अन्सारीले सबैलाई जानकारी गराउँदै हरिनगर गाउँपालिकालाई नगरपालिका बनाउन आफू लागि परेको समेत बताए ।
हरिनगर गाउँपालिकामा विकासमा फड्को मारेको र धेरै संरचनाहरु तयार भइसकेकोले हरिनगरलाई नगर उन्मुख तिर लगिरहेको छु, उनले भने, ‘यसका लागि सबै प्रक्रियाहरु अगाडि सार्दै छु ।’
“हाम्रो हरिनगर राम्रो हरिनगर” बनाउनका लागि चार वर्षमा धेरै विकासका नमुना कामहरु गरेकोले चाडो भन्दा चाडो नगरपालिकाको सपना पुरा गराउन आफू तम्तयार रहेको अध्यक्ष अन्सारीको भनाई छ ।
