हरिनगर । सुनसरीको हरिनगर–४ स्थित रहेको बाबा जितमहान मन्दिर निर्माण भएको २० वर्ष भन्दाबढी भइसकेपनि मन्दिर जस्ताको त्यस्तै छ । बाबा जितमहान मन्दिर हरिनगर–४ को बालुवानमा सानो आकारमा बनेपनि सरोकारवाला निकायको ध्यान गएको छैन् । हरिनगरको सबैभन्दा पुरानो मन्दिरको रुपमा चिनिन्छ । यो मन्दिरमा खासगरी महिलाहरुले जितिया पर्वको अवसरमा पुजाआजा गर्ने गरिन्छ । महिलाहरुको लागि पुजाआजा गर्नको लागि २० वर्ष अघि नै चन्दा उठाएर सानो आकारमा बनाएपनि हालसम्म जस्ताको त्यस्तै संरचनामा रहेको स्थानीय महिलाहरु बताउँछन् ।
मधेशी समाजका महिलाहरुले दशैंको केही दिन अघि उपवास बसी सो मन्दिरमा पुजाआजा गर्ने गरेको स्थानीय सिर्जना मेहताले बताइन् । हरिनगर गाउँ विकास समिति हुदाँ नै बालुवान भन्ने ठाउँमा पहिलो पटक बाबा जितमहान मन्दिर निर्माण गरिएको थियो ।
स्थानीय पुर्नसंरचना पछि स्थानीय सरकारको निर्माण भएपश्चात हरिनगरका कैयौ मठमन्दिर, मदर्सा, इदगाहा लगायतको मर्मत सम्भार तथा निर्माण कार्यभए पनि स्थानीय सरकारको ध्यान नगएको अर्का महिला मंजु देवी मेहताले गुनासो गरेकी छिन् ।
मन्दिरको आकार सानो भएकोले जितिया पर्वको अवसरमा पुजाआजा गर्न समस्या भएको छ । बालुवान स्थित रहेको मन्दिरलाई फराकिलो र ठूलो मन्दिर बनाईदिनका लागि हरिनगर गाउँपालिकालाई महिलाहरुले आग्रह गरेका छन् ।
जितिया पर्व आउन केही हप्ता मात्र बाँकी रहेको भएपनि मन्दिरको बारेको सरोकारवाला निकाय मौन रहेको पाइएको छ । हरिनगर गाउँपालिकाले हरिनगर बजार क्षेत्रको मन्दिर निर्माण कार्यलाई प्राथमिकता दिएको, भुटाहा बजार क्षेत्रमा रहेको दुर्गा मन्दिरलाई बजेट बिनियोजन गरी काम सुचारु गरेको हुनाले बाबा जितमहान मन्दिरलाई पनि प्राथमिकतामा राखेर मन्दिर बनाई घेराबेरा गरिदिनका लागि गाउँ पालिका सँग माग गरेका छन् ।
मधेशी र थारु समाजका महिलाहरुले तीन दिनसम्म मनाउने ऐतिहासिक पर्व जितिया पर्व हो । श्रीमान र छोराछोरीको स्वास्थ्य र दिर्घायुको कामना गर्दै उपवास बसी जितिया पर्व मनाउने गरेकोले महिलाको हकमा पनि हरिनगर गाउँपालिका गम्भिर हुनुपर्नेमा उनीहरुले जोड दिएका छन् ।
महिलाहरुले पुजाआजा गर्ने सबैभन्दा पुरानो मन्दिर भएपनि न त ४ नम्बर वडा कार्यालयको ध्यान गएको छ ? न त हरिनगर गाउँपालिकाको ध्यान गएको छ ? हरिनगर गाउँपालिकाको कार्यालयदेखी एक सय मिटर उत्तर बालुवानमा सानो क्षेत्रफलमा निर्माण भएको मन्दिरको अवस्था स्थापना काल देखि जस्ताको त्यस्तै रहेको छ ।
बाबा जितमहान मन्दिर व्यवस्थापन समितिको अध्यक्ष प्रमेश्वर मेहताले मन्दिरको संरचना भत्काई नयाँ बनाउनुपर्ने जोड दिदै हरिनगर गाउँपालिकाले बजेट दिएर मन्दिर निर्माण कार्यलाई सुचारु गर्नुपर्ने बताए । समितिका सचिव शशी कुमार मेहताले ४ नम्बर वडाका जनप्रतिनिधिहरुलाई जानकारी रहेको भएपनि कुनै वास्ता नगरेको गुनासो गरेका छन् । वडाका जनप्रतिनिधहरुले योजना तथा बजेट निर्माण गर्दा समेत कुनै जानकारी नगरेकोले मन्दिरको अवस्था जिर्ण बन्दै गएको छ उनले भने ।
