टोमराज मेहता
इनरुवा । प्रदेश नम्बर–२ का आन्तरिक मामिला तथा संचारमन्त्री भरत प्रसाद साहले मुलुकको विकास र समृद्धिका लागि साह समाज निर्माण भएको बताएका छन् । सुनसरीको इनरुवामा साह सेवा समिति इनरुवा नगर कार्यसमितिको पाँचौ नगर अधिवेशनका प्रमुख अतिथि समेत रहेका मन्त्री साहले मुलुकको निकासका लागि विकास र समृद्धिले साह समाजलाई मदत पुग्ने बताएका हुन् ।
आन्तरिक मामिला तथा संचारमन्त्री साहले मुलुकभरीका साह जातिहरु एकीकृत हुन आवश्यक रहेको बताउँदै राजनीतिकमा पनि साह जातिहरुले नेतृत्व गर्न सक्ने क्षमताको विकास गर्नुपर्ने बताए । उनका अनुसार साह समाजका अगुवा व्यक्तिहरुले राजनीतिकमा पहुँच पुगाउन सकेमात्र सबै पक्ष मजबुत हुन्छ । उनले भने, ‘मधेश अन्दोलन र माओवादीको जनयुद्धबाट पहिचान कायम भएको छ । त्यसैले साह जातिहरुको संगठन बलियो बनाई राजीतिक गर्ने हैसियत राखी संघ,प्रदेश र स्थानीय तहमा प्रतिनिधित्व गर्ने गरी अगामी निर्वाचनमा भूमिका खेल्नुपर्छ ।
समाजका विकास र समृद्धिका लागि साह जातिहरुले जनसंख्याको आधारमा आफनो अधिकार सुनिश्चित गर्न अग्रसर हुनुपर्नेमा उनले जोड दिदै हरेक क्षेत्रमा युवाहरुको पहुँच र सक्रियता बढाउनुपर्ने बताए ।साह समाजका बालबालिका, युवाहरुलाई शिक्षातर्फ पनि अगाडी बढाउन र नेपाली राजनीतिक बुझन आवश्यक रहेकोले अगामी दिनमा हरेक क्षेत्रमा सहभागिता हुनुपर्नेमा जोड दिएका छन् ।
त्यसैगरी इनरुवा नगरपालिकाका नगरप्रमुख राजन मेहताले बिभिन्न आन्दोलनबाट प्राप्त उपलब्धीबाट शहीदहरुको सपना साकार हुन नसकेको बताए । साह सेवा समिति इनरुवा नगर कार्य समितिको पाँचौ अधिवेशनको बिशिष्ट अतिथि समेत रहेका नगरप्रमुख मेहताले जाति, धर्म,संस्कृति, रितिरिवाजलाई संरक्षण र सम्वद्र्धन गर्नुपर्नेमा जोड दिएका छन् ।
नगरप्रमुख मेहताले साह समाजका अगुवा तथा नेतृत्वकर्ताहरुलाई जिब्रो जस्तो नम्र बनेर समाजका व्यक्तिहरुको मन जित्न आवश्यक रहेको बताए । कडा भाषण गरेर साह समाजको मन जित्न नसक्ने तर्क गर्दै उनले जातिय सहिष्णुताको कुरा उठाएर समाज तोड्नु भन्दा संघर्ष गरेर साह समाजको स्थापना गर्न सबैले लाग्नुपर्ने बताए ।
साह समाजले गर्दा पनि इनरुवा सिंगारिएको र भविष्य पनि यहाँ रहेको नगरप्रमुख मेहताले साह समाजबाट डायनमिक लिडर तयार गर्नुपर्नेमा जोड दिए । उनले भने,‘ आफैमा जुधेर केही पाइदैन् । ‘भाई फुटे गवार लुटे’ भन्ने झै आफैमा द्धन्द्ध सिर्जना गरेर फुटको राजनीतिक नगर्न आग्रह गर्दै एकता र सहमतिबाट सबैलाई अगाडी बढ्नुपर्छ उनले भने ।
तेली कल्याण समाज केन्द्रीय कार्य समितिमको सचिवालय सदस्य दिलीप चन साहुले अगामी निर्वाचनमा भोज खाएर भोट दिने प्रवृतिलाई हटाउन जरुरी रहेको बताए । साह जातिहरुको पहिचान, सम्मान र सहभागिताका लागि साह समाज एक ढिक्का हुनुपर्नेमा उनले जोड दिए । हरेक क्षेत्रमा राजनीतिक प्रभाव पर्ने भएकोले अबका दिनमा जातिय संगठनबाट राजनीतिक गर्नुपर्ने आजको आवश्यकता भएको उनले बताए ।
त्यसैगरी साह सेवा समिति जिल्ला कार्य समितिका अध्यक्ष रामकुमार साहले साह जातिको अन्तरराष्ट्रि पहिचान भएको बताए । अधिकार र संघर्षलाई सदैव निरन्तरता दिदै जातिय उत्थानका लागि आवाज उठाउनुपर्छ उनले भने । साह जातिको संगठनलाई गाउँ गाउँमा बिस्तार गरी नेतृत्व गर्ने तहमा पुर्याउन आवश्यक रहेको जिल्ला अध्यक्ष साहले शुभकामना मनतब्यमा व्यक्त गरेका थिए ।
अधिवेशनका नगर अध्यक्ष सुरेन्द्र कुमार साहको अध्यक्षतामा सम्पन्न भएको उद्घाटन सत्रमा जसपाका केन्द्रीय सदस्य हंसा साह,महिचन्दश् साह लगायतकाले शुभकामना व्यक्त गरेका थिए भने कार्यक्रम श्याम साहले संचालन गरेका थिए ।
