धरान । नेपाली कांग्रेस सुनसरीका सभापति राजीव कोइरालाले भदौं २१ गते हुने वडा अधिवेशनमा सहमतिमा नै नेतृत्व चयन गर्नुपर्ने बताएका छन् । सुनसरीको धरानमा श्री गिरिराज आचार्य सिर्जनशील पत्रकारीता पुरस्कार–२०७८ कार्यक्रमलाई सम्वोधन गर्दै प्रदेश १ का संसदीय दलका नेता समेत रहेको कोइरालाले १४ औं महाधिवेशनलाई सफल पार्दै वडा अधिवेशनमा सहमतिबाट नेतृत्व गर्नुपर्ने बताएका हुन् । गुटउपगुट सुनसरीमा नरहेकोले कांग्रेसका नेता तथा कार्यकर्ताहरुले भ्रममा नपारी योग्य व्यक्तिहरुलाई सहमतिमा नेतृत्व चयन गरी सुनसरीले देशभरमा सकारात्मक सन्देश प्रवाह गर्न कांग्रेसका नेता तथा कार्यकर्ताहरुलाई आग्रह गरेका छन ।
सुनसरीमा भदौं २१ गते वडा अधिवेशनको मिति तोकिएको हुदाँ आपसी समझदारीमा विवाद नगरीकन नेतृत्व चयन गरी भब्यक्तका साथ सफल बनाउनुपर्नेमा नेता कोइरालाले जोड दिएका दिए । मुलुकको नजर सुनसरीमा रहेकोले सबै तहको अधिवेशनमा सहमतिमा नेतृत्व चयनसँगै पार्टीको संगठनलाई बलियो बनाउँदै आउँदो निर्वाचनलाई ख्याल गरि एकजुटको विकल्प नरहेको समेत उनले बताए ।
प्रदेश १ का प्रमुख प्रतिपक्षी दलका नेता कोइरालाले गिरिराज आचार्य पञ्चायतकालमा प्रजातन्त्रका लागि कांग्रेसले गरेको संघर्षको जिउँदो इतिहास भएको बताउँदै भने ‘उहाँको सम्मानमा स्थापित पुरस्कार लोकतन्त्र, संघीयताको अधिकारका लागि पत्रकारीता गर्दै आउनु भएका पत्रकार भैरब आङगालालाई प्रदान गर्ने संस्थापक सञ्चालकहरुको निर्णय प्रशंसायोग्य छ ।’ उनले आचार्यको सम्मानमा पुरस्कार स्थापना गरेर धरानमा उदाहरणीय कार्य भएको बताउँदै कांग्रेसको संघर्षमा इतिहासकारहरुले नलेखेका धेरै कुरा आचार्यको पुस्तकहरुमा उल्लेख भएको बताए ।
प्रदेश १ कांग्रेस संसदीय दलका नेता कोइरालाले विहीवार आयोजित एक समारोहका विच आङगलालाई सम्मानपत्र सहित पुरस्कार प्रदान गरेका हुन् । पुरस्कृत आङगला दुई दशक देखी रेडियो, टेलिभीजन, अनलाइन र छापा माध्यममा कृयाशील रहँदै आएका पत्रकार हुन् ।
धरानका अग्रज पत्रकार तथा नेपाली कांग्रेस सुनसरीका संस्थापक सचिव गिरिराज आचार्यको सम्मानमा स्थापित २० हजार रुपया राशीको श्री गिरिराज आचार्य सिर्जनशील पत्रकारीता पुरस्कार–२०७८ पत्रकार भैरब आङगलालाई प्रदान गरिएको छ ।
उक्त पुरस्कार धरान उपमहानगरपालिका मेयर तिलक राईले नगर प्रमुखलाई प्राप्त हुने सेवा सुविधा भत्ताको रकमबाट कुल २ लाख रुपया प्रदान गरि अक्षयकोषमा राखेर स्थापना गरिएको हो । प्रत्येक वर्ष प्रदान गरिने पुरस्कार यसपाली पहिलो पटक प्रदान गरिएको हो ।
अक्षयकोष तथा पुरस्कार नेपाली कांग्रेस र नेपाल प्रेस युनियनको सहकार्यमा सञ्चालन गर्न सञ्चालक समिति गरिएको छ ।
नेपाल पत्रकार महासंघ सुनसरीका सभापति जनकऋषि राई, नेपाली कांग्रेस सुनसरी जिल्ला सचिव सुजेन्द्र तामाङ, कांग्रेस धरान उपमहानगरका सचिव श्याम पोखरेल, नेपाल जेसिजका विष्णु बराल लगायतकाले शुभकामना व्यक्त गरेका थिए ।
