इनरुवा । सुनसरीको श्रीलंका टप्पुमा रहेको चिलैया, गरैया क्षेत्रमा सप्तकोशी नदीले गरिरहेको कटानको अवस्था बुझ्न गृहमन्त्री बालकृष्ण खाँडले बाढी प्रभावित क्षेत्रको अनुगमन गरेको छ ।
अविरल वर्षापछि आएको बाढीका कारण भएको क्षति तथा वस्तुगत अवस्थाबारे बुझ्नका लागि गृहमन्त्री बालकृष्ण खाँडको नेतृत्वमा शनिबार अनुगमन गरिएको हो ।
सप्तकोशी नदीमा आएको बाढीले सुनसरीको बराहक्षेत्र नगरपालिका वडा नम्बर ६ र ९ को श्रीलंका टापुमा तीव्र कटान गरिरहेको छ ।
भारतले पश्चिमतर्फ तटबन्ध निर्माण नगर्दा यस क्षेत्रमा बाढीले बर्षेनी हजारौं बिघा जमिन कटान गरेको स्थानीय सन्तोष कुमार चन्द्र्वशीले बताए । उनले भने, ‘सप्तकोशीको बाढी जमिन कटान गर्दै बीचमा पर्ने श्रीलंका टापुको बस्ती नजिक आएपछि त्रसित बनेको छु ।’
सप्तकोशीको बाढीले पश्चिमतर्फको भू–भाग कटान गर्दा श्रीलंका टापुका ५ सय घरपरिवार बाढीको उच्च जोखिममा परेको बराहक्षेत्र नगरपालिकाका वडा नम्बर ६ का वडा सदस्य श्यामबहादुर लिम्बूले बताएका छ्न ।
सप्तकोशीले पश्चिमतर्फको श्रीलंका टापु आसपासका क्षेत्रमा नौ किलोमिटर लम्बाई र एक किलोमिटर चौडाई कटान गर्दा २ हजार ५ सय बिघा खेतियोग्य जमिन गुमाउनु परेको वडासदस्य लिम्बूले बताए ।
सप्तकोशी नदीको बाढी बस्ती नजिक आएपछि सप्तकोशीको बीचमा रहेको श्रीलंका टापुका ५ हजारभन्दा बढी सर्वसाधारण विस्थापित हुने अवस्था रहेकाले तत्काल कोशी कटान नियन्त्रणको काम थाल्नुपर्ने स्थानीयवासिले माग गरेका छन् ।
अनुगमन सुरु गर्दै गृहमन्त्री खाँडले बाढी प्रभावित क्षेत्रहरुमा सरकारले अनुगमन पश्चात उद्धार तथा राहतको कार्य सुरु गरिने बताए । उनले बाढीको प्रभावलाई न्यूनीकरण गर्न सरकारले आगामी दिनहरुमा विज्ञमार्फत दिर्घकालिन योजना ल्याउन गइरहेको समेत जानकारी दिए ।
गृहमन्त्री खाँडले राहतका लागि सरकार पूर्ण रुपले तम्तयार रहेकाले छिट्टै प्रभावित क्षेत्रमा राहत टोली समेत पुग्ने स्पष्ट पारे । उनले बाढीले पु¥याएको क्षतिको स्थलगत अनुगमन गरी वास्तविक पीडितलाई राहत उपलब्ध गराउने र अन्य मर्मतसम्भार जस्ता कामको लागि समितिले सरकारलाई सिफारिस गर्ने जानकारी दिए ।
गृहमन्त्री बालकृष्ण खाणसहितको टोली सप्तकोशी नदीमा आएको बाढीका कारण भइरहेको कटान तथा बस्ती डुवान भएको क्षेत्रको स्थलगत अवलोकनका लागि उदयपुरको बेलका नगरपालिकाको प्रभावित क्षेत्र आइपुगेको छ ।
केही दिनदेखिको अविरल वर्षाका कारण सप्तकोशीमा बाढीले निरन्तर कटान गरेर बस्तीलाइ पारेको प्रभाव निरीक्षण गर्न गृहमन्त्री खाँडसहितको टोली कटान प्रभावित अनुगमन गरेर फकिएको छ ।
गृहमन्त्री खाणका साथै टोलीमा पूर्वमन्त्रीद्वय मोहन बस्नेत र शेरबहादुर तामाङ, राष्ट्रिय योजना आयोगका उपाध्यक्ष विश्वनाथ पौडेल, गृह मन्त्रालयका सचिव टेकनारायण पाण्डे लगायतका पदाघिकारीहरु थियो ।
गृहमन्त्री खाणसहितको टोली कटान प्रभावित क्षेत्रमा उपस्थित उदयपुर, सुनसरी र सप्तरी जिल्लाका प्रमुख जिल्ला अधिकारीसहित उच्च सुरक्षा अधिकृतहरुसंग सप्तकोशी नदीमा आएको बाढी र कटानले बेलका नगरपालिकाका साथै अन्य जिल्लामा पारेको प्रभावका बारेमा जानकारी लिने सुनसरीका प्रजिअ उमेश ढकालले जानकारी दिए ।
