डि.के. रेग्मी
इनरुवा । नेपाली कांग्रसका वर्तमान जिल्ला सचिव केदार भण्डारीले जिल्ला सभापतिको दावेदारी केही समय अगाडि नै गरीसकेका छन् ।
पार्टीको काममा दृढसंकल्पित भएर लाग्ने उनको बानीलाई जिल्ला भरि नै सबैले तारिफ गर्दै आएका छन् जसका कारण उनले दुई कार्यकाल जिल्ला सचिवको पद सफलतापुर्वक पुरा गरे ।
सभापति राजीव कोइरालाको काँधमा काँध मिलाउदै देशैभरमा सुनसरी जिल्लालाई गुटरहित जिल्लाका रुपमा चिनाउन भण्डारीलगायतको टिम सफल पनि भइरहेको छ अहिलेसम्म । कार्यकर्तामाझ दौडाहामा लागेका भण्डारीको अहिले एउटै सोच छ पार्टीको जिल्ला सभापति हुने र पार्टीलाई अझ सशक्त रुपमा बलियो बनाएर अगाडि लाने ।
सभापति कोइरालाको कार्यकालमा एकजुट भएको कांग्रेसको साखलाई जोगाइराख्ने र अझ सशक्त बनाएर लानेमा उनी दृढ संकल्पित छन् ।
निर्वाचन प्रजातान्त्रिक प्रणाली भएकोले निर्वाचनबाट उनी डराएका छैनन् तर पनि उनी चाहन्छन् सबैको सर्वसहमतिको जिल्ला सभापति बन्न ता कि यो पार्टी गुट, उपगुटमा नबाढियोस् ।
पार्टीको जिल्ला सचिव भएर दुई कार्यकाल चलाइ सकेका भण्डारी आफ्नो विकल्पका बारेमा सोच्न चाहँदैनन् अहिले । भण्डारी युवाहरुलाई राजनीतिको मुल धारमा ल्याएर उचित जिम्मेवारी दिन चाहन्छन् । उनी भन्छन्– अब अग्रजहरुलाई उचित सम्मान दिनुपर्छ र युवालाई उचित जिम्मेवारी । तबमात्र पार्टीप्रति आम नागरिकको आकर्षण बढ्छ ।
सम्पुर्ण युवालगायत अग्रजहरुको साथ पाएका भण्डारी आगामी कार्यकालका लागि सभापति हुनेमा ढुक्क छन् भने कार्यकर्ता समेत उनको विकल्पको बारेमा कमसे कम यो पल्टका लागि सोच्ने अवस्थामा देखिंदैनन् ।
