इनरुवा । “मेरो गणना, मेरो सहभागिता” राष्ट्रिय जनगणना २०७८ भन्ने मुल नाराका साथ जिल्ला जनगणना कार्यालय सुनसरीका कर्मचारीहरु प्रत्येक घर–घरमा गएर सूचिकरण विवरण संकलन गर्न बुधवारदेखी जाने भएका छन् ।
जिल्ला जनगणना कार्यालय सुनसरीका कर्मचारीहरुलाई ७ दिने तालिम दिएर बुधवारदेखी सूचिकरणका लागि विवरण संकलन गर्न प्रत्येकको घर–घरमा सुपरिवेक्षकहरुले तोकिएको क्षेत्र ,घरधुरी र बसोवासको अवस्था, महिला, पुरुष र अन्य लिंगीका बारे तथ्याङ्क संकलन गर्नका लागि बुधवारबाट जाने भएको हो । आज बुधवार भदौं ३० गतेदेखी असोज १८ गतेसम्म २० दिनसम्म प्रत्येकको घर–घरमा सुपरिवेक्षकहरुले सूचिकरण विवरण संकलन गर्न जाने भएको हो ।
जिल्ला जनगणना कार्यालय सुनसरीले सूचिकरण संकलन गरेपछि कार्तिक २५ गतेदेखी मंसिर ९ गतेसम्म १५ दिनसम्म मुख्य गणकहरुले जनगणना सुरु गर्नेछन् । घरदैलो कार्यक्रम अन्तरगत सूचिकरण विवरण संकलन गर्नका लागि जाने भएकाले आ–आफनो घर तथा घरपरिवारको बास्तविक विवरण दिई सहयोग गरिदिनका लागि जिल्ला जनगणना कार्यालय सुनसरीले सबैलाई अनुरोध गरेको छ ।
सुपरिवेक्षकहरुलाई गत बैशाख १६ गतेदेखी २० गतेसम्म पाँच दिने तालिम दिएको र कोभिड १९ का कारण दुई दिन तालिम दिन नसकेका कारण भदौं २८ र २९ गते दुई दिने सूचिकरण विवरण संकलन गर्नका लागि तालिम दिएर प्रत्येकको घर–घरमा सुपरिवेक्षकहरु जाने भएका हुन ।
जिल्ला जनगणना कार्यालय सुनसरीले सूचिकरण विवरण संकलन गर्नका लागि दुई समुहमा बिभाजन गरेको छ । जिल्ला जनगणना कार्यालय ‘क’ मा धरान उपमहानगरपालिका, इटहरी उपमहानगरपालिका र बराहक्षेत्र नगरपालिकामा १ सय २१ जना सुपरिवेक्षकहरु परिचालन हुनेछ । यसैगरी इनरुवा नगरपालिका, दुहबी नगरपालिका, रामधुनी नगरपालिका, कोशी, भोक्राहा–नरसिंह, हरिनगर, देवानगंज, बर्जु र गढी गाउँपालिका गरी ९ वटा स्थानीय तहहरुलाई जिल्ला जनगणना कार्यालय ‘ख’ अन्तरगत १ सय १३ जना सुपरिवेक्षकहरुलाई परिचालन गर्ने जिल्ला जनगणना कार्यालय सुनसरीले जनाएको छ ।
दुई दिने तालिमका स्थानीय जनगणना अधिकारी मनोज मेहता, जिल्ला जनगणना अधिकारी सुभाष अधिकारी र प्रशिक्षकहरु श्याम साह, सन्तोष काफ्ले, राजकुमार मेहता र एकराज पोखरेलले सहजिकरण गरेका थिए ।
