इनरुवा । विश्व रेविज दिवस २०७८ को अवसरमा सुनसरीको १२ वटै स्थानीय तहमा रेविज विरुद्धको निःशुल्क खोप अभियान संचालन भएको छ ।
भेटेरिनरी अस्पताल तथा पशुसेवा विज्ञ केन्द्र इनरुवा सुनसरीको आयोजना र नेपाल भेटेरीनरी एशोसिएसन नेपाल पाराभेटेरीनरी एण्ड लाइभष्टक एशोसिएसनको सहयोगमा हिजोबाट असोज १२ गते सम्म १२ वटै स्थानीय तहमा रेविज विरुद्धको निःशुल्क खोप अभियान संचालन भएको हो ।
घरपालुवा कुकुर बिरालोलाई रेविज विरुद्धको खोप लगाऔं र यसलाई परास्त गरौं भन्ने मुल नाराका साथ एकहप्ते रेविज विरुद्धको खोप अभियान हिजोबाट सुरु भएको पशुसेवा विज्ञ केन्द्र सुनसरीले जनाएको छ ।
भेटेरिनरी अस्पताल तथा पशुसेवा विज्ञ केन्द्र इनरुवाले बुधवार स्थानीय तहका पशु सेवा शाखाहरुलाई खोप वितरण गरेको बताएको छ । सुनसरीको इनरुवा, दुहबी, रामधुनी, बराहक्षेत्र नगरपालिका, कोशी, भोक्राहा नरसिंह, हरिनगर, देवानगंज, बर्जु, गढी लगायतको गाउँपालिकाको पशु सेवा शाखाहरुमा रेविज विरुद्धको निःशुल्क खोप उपलब्ध गराएको र केही पालिकाहरुमा बाँकी रहेकोले वितरण गर्ने समेत पशु सेवा विज्ञ केन्द्र सुनसरीले जनाएको छ ।
गाउँघरमा घरपालुवा कुकुर विरालो र भुसुस्याहा कुकुरलाई समेत रेविज विरुद्धको खोप लगाउने अभियान अन्तरगत खोप कार्यक्रमलाई प्राथमिकताका साथ सुरु गरिएको छ ।
