भुटाहा । सुनसरीको हरिनगर गाउँपालिका–१ भुटाहा बजार स्थित आरभ उपचार किल्निकमा निःशुल्क आँखा शिविर सम्पन्न भएको छ ।
स्थानीय बासिन्दालाई गाउँमै उपचार सेवा दिने उद्देश्यले आरभ उपचार किल्निकले आयोजना गरेको आँखा शिविरमा दुई सय ५० जनाले सेवा लिएको हो। आरभ उपचार किल्निक हरिनगर–१ भुटाहाको आयोजना तथा गोल्छा आँखा अस्पताल बिराटनगरको प्रविधिक सहयोगमा आँखा शिविर सम्पन्न भएको हो ।
स्थानीयवासीको समस्यालाई ध्यानमा राखेर आँखा शिविर गर्ने निर्णय गरेको आरभ उपचार किल्निकका संचालक अनिल साहले जानकारी दिएको हो । शिविरमा दुई सय ५० जनाले निःशुल्क उपचार सेवा लिएको साहले भने, ‘उपचार सेवा लिनेमा १ सय ६७ पुरुष र ८७ महिला छन् ।’
शिविरमा उपचार गराएका मध्ये ५१ जनालाई आँखाको मोतियाविन्दु र मासु पलाएको भेटिएकाले थप उपचारका लागि निःशुल्क शल्यक्रिया गर्न गोल्छा आँखा अस्पताल बिराटनगर लगिएको छ । त्यस मध्ये ३० जना पुरुष २१ जना महिला रहेको कार्यक्रम संयोजक चन्देश्वर सरवरियाले बताए । शिविरमा आँखा जाँच गर्न आएका मध्ये दुई सय जनालाई निःशुल्क औषधी र ७५ जनालाई निःशुल्क चश्मा समेत वितरण गरिएको थियो ।
