काठमाडौं । २०७७ को मदन पुरस्कार भगिराम इङ्नाम सम्मानित हुनुभएको छ ।
बिहीबार बसेको मदन पुरस्कार गुठीको साधारण सभाले ‘लिम्बुवानको ऐतिहासिक दस्तावेज संग्रह’ पुस्तकका लागि इङ्नामलाई मदन पुरस्कार दिने निर्णय गरेको हो । मदन पुरस्कारका लागि २ सय २२ पुस्तकमध्येबाट ९ वटा पुस्तक छनोटमा परेका थिए ।
यस्तै बैठकले भैरवबहादुर थापालाई जगदम्बा–श्री पुरस्कार दिने निर्णय गरेको छ । सात दशकदेखि नेपाली नृत्य विधाको अध्ययन, अनुसन्धान र मञ्चन गर्दै सैद्धान्तिक तथा प्रयोगात्मक ज्ञानमार्फत् नृत्यक्षेत्रको उन्नयनमा समर्पित भएकाले थापालाई पुरस्कार दिने निर्णय गरेको अध्यक्ष कुन्द दिक्षितद्वारा जारी विज्ञप्तिमा उल्लेख छ ।
नेपाल तथा नेपालबाहिरकबाट प्राप्त नेपाली भाषामा प्रकाशित पुस्तकरूमध्येबाट एक पुस्तकलाई मदन पुरस्कार तथा नेपाली भाषा, वाङ्मय तथा संकृतिको श्रीवृद्धिमा योगदान गर्ने व्यक्ति तथा संस्थालाई जगदम्बा–श्री अर्पण गरिन्छ ।
गुठीले वि.सं. २०१२ सालदेखि मदन पुरस्कार र २०४५ सालदेखि जगदम्बा–श्री पुरस्कार वितरण गर्दै आएको छ ।
श्रोत : www.imagekhabar.com
