इनरुवा । इनरुवा अस्पताल सुधार संघर्ष समितिका संयोजक दिलिप चन साहुले इनरुवा मृत नगर भए जस्तो र जनता मुर्दा जस्तो बनेको बताएका छन् । संघर्ष समितिले इनरुवामा जारी राखेको धर्ना कार्यक्रम सोमवार समापन कार्यक्रमलाई सम्वोधन गर्दै यस्तो बताएका हुन् ।
असोज ५ गतेदेखी सुरु गरेको धर्ना कार्यक्रम सोमवार सम्पन्न भएको हो । इनरुवा अस्पताल सुधार संघर्ष समितिको पूर्व घोषित कार्यक्रम अनुसार एक हप्ता धर्ना कार्यक्रमलाई निरन्तरता दिदै हिजो सम्पन्न गरेको हो ।
इनरुवा अस्पतालमा सेवा सुविधा उपलब्ध नगराइएको र समितिले २५ बुँदे उठाएको मागलाई हालसम्म सम्वोधन गर्न नसकेको कारण धर्ना कार्यक्रमलाई स्थगित गरेर रिले अनसन कार्यक्रम सुरु गर्ने तयारीमा जुटेको संघर्ष समितिको संयोजक साहुले बताए ।
जिल्ला अस्पताल इनरुवा जस्तो नभएको भन्दै इनरुवा मृत नगर जस्तो लाग्न थालेको, उनले भने, ‘जिल्ला अस्पतालमा सेवा सुविधा नभएको भन्दै बिरामीहरुलाई रेफर मात्रै गरेको छ ।
संघर्ष समितिले १० महिना अघिदेखी माग पुरा गराउनका लागि स्थानीय सरकार, सुनसरी प्रशासन, अस्पताल विकास समिति, प्रदेश सरकार र संघीय सरकारलाई गुहार गर्दा समेत अहिले सम्म कुनै सुनवाई नभएको गुनासो समेत उनले गरेका छन् ।
सातौ दिनको धर्ना कार्यक्रममा संयोजक साहुले बोल्दै २५ बुँदै माग सबै निकायले जायज भएको स्वीकार गरेको भएपनि माग सम्वोधन नगरेको बताए । सातौ दिनसम्म धर्ना कार्यक्रम गरेपनि माग सुनवाईको कुनै छाटकाट नदेखिएको समेत उनले गुनासो गरे ।
इनरुवा अस्पतालमा उपचार नगरी बाहिरको अस्पतालमा रेफर गर्ने गरेको छ । बिरामीहरुले लामबद्ध भएर गर्मीयामको मौसममा अस्तपालमा रेफर लिनका लागि बसेपनि उनीहरुको लागि पंखा र एसीको समेत व्यवस्था नरहेकोले बिरामीहरुले सास्ती भोग्नुपरेको उनको भनाई छ ।
इनरुवा अस्पतालमा पार्टीका कार्यकर्ताहरुलाई भर्ना गरी भर्तीकेन्द्रको रुपमा स्थापना गरेकोले भाइ भतिजाहरुलाई अस्पतालबाट हटाउनुपर्ने माग समेत संघर्ष समितिले गरेको छ । जनताको लागि शिक्षा र स्वास्थ्य मौलिक अधिकार भएपनि अस्पताल प्रशासनले अधिकारबाट कुण्ठित गरेको समेत संघर्ष समितिको ठहर छ ।
अस्पताल सुधारका लागि १० महिनादेखी लगातार आवाज उठाएपनि हालसम्म कसैको ध्यानाकर्षण नभएको समितिले जनाएको छ । सुनसरी क्षेत्र नम्बर–२ का सांसद सीताराम मेहता, प्रदेश–१ सांसद राजीव कोइराला, इनरुवा नगरप्रमुख राजन मेहता, अस्पताल विकास समितिका अध्यक्ष गोपालराज भण्डारी लगायतका जनप्रतिनिधिहरुले समेत चासो नलिएको हुदाँ उनीहरुप्रति धिक्कार छ, संयोजक साहुले भने ।
जनताप्रति गैर जिम्मेवारी र उतरदायी नबनेको भन्दै संयोजक साहुले अस्पतालको बेथितिलाई कसैले पनि अन्त्य गर्न पहल र प्रयास नगरेकोले संघर्ष समितिले १० महिनादेखी माग पुरा गराउनका लागि आन्दोलनको कार्यक्रम सुरुवात गर्न बाध्य बनाएको धर्ना कार्यक्रमका वक्ताहरुले बताएका छन् ।
माग पुरा नभएकोले दवावमुलकका लागि रिले अनसन कार्यक्रमको तयारीमा थालिएको समेत वक्ताहरुले बताए । इनरुवाबासी लगायत आसपास क्षेत्रका बिरामीहरुलाई समेत उपचार नगरी बाहिरको अस्पतालमा रेफर गर्ने गरेकोले अस्पतालमा रेफर होइन, उपचार चाहियो भन्ने मुल नारालाई सार्थक बनाउने प्रयासमा समेत उनीहरु सक्रिय हुन थालेका छन् ।
इनरुवा अस्पताल सुधारको लागि गठित संघर्ष समितिले सात दिनको धर्ना कार्यक्रमलाई समापन गर्दै आन्दोलनको थप कार्यक्रमहरु सार्वजनिक गरेको छ । असोज १५ गतेदेखि कार्तिक मसान्तसम्म ५० ठाँउमा संघर्ष समिती बिस्तार तथा अन्य पालिकामा अन्तरक्रिया गर्ने, मंसिर १ गतेदेखि इनरुवा बजारको गोल चौकमा रिले अनशन बस्ने कार्यक्रम घोषणा गरेको इनरुवा अस्पताल सुधार संघर्ष समिति सुनसरीले जनाएको छ । अस्पताल सुधारको अभियानमा प्रत्यक्ष र अप्रत्यक्ष साथ, सहयोग र सहयोग गरेकोमा सबैलाई संयोजक साहुले धन्यवाद ज्ञापन समेत गरेका छन् ।
सातौ दिनसम्मको धर्ना कार्यक्रमलाई सम्वोधन गर्दै संयोजक साहुले इनरुवा नगरप्रमुख राजन मेहतालाई बढी होच्याएको र च्यालेनज दिएको स्थानीयहरुले बताएका छन् । सातौ दिनसम्म सबैभन्दा बढी केन्द्रीत भाषण नगर प्रमुख मेहता माथि नै इंकित गरेर संयोजक साहुले आक्रोसित मन्तब्य व्यक्त गरेको इनरुवाबासीले सुरसेर दैनिकलाई बताएका छन् ।
