इनरुवा । नेपाली कांग्रेस सुनसरीका सभापति एव प्रदेश–१ का संसदीय दलका नेता राजीव कोइरालाले जनतालाई सेवा प्रवाह गर्नु इनरुवा नगर कांग्रेसको प्रमुख जिम्मेवारी हुनुपर्ने बताएका छन् ।
सुनसरीको इनरुवामा नेपाली कांग्रेस १४ औं नगर अधिवेशनबाट निर्वाचित पदाधिकारीहरुलाई प्रमाण–पत्र वितरण एव पदस्थापना साथै सम्मान कार्यक्रमलाई सम्वोधन गर्दै नेता कोइरालाले इनरुवा नगर कांग्रेस जनताको सेवालाई प्रभावकारी बनाउन लागिपर्नु पर्ने बताएका हुन् ।
इनरुवा नगरमा निर्वाचित पदाधिकारीहरुलाई प्रमाण–पत्र वितरण एव पदस्थापना साथै सम्मान कार्यक्रमका प्रमुख अतिथि समेत रहेका नेता कोइरालाले नेपाली कांग्रेस इनरुवा नगर कार्य समितिले नगर क्षेत्रभित्रका गरीव तथा निमुखा जनताको लागि सेवा, सुविधा र सरलताका लागि काम गर्नका चनाखो हुनुपर्ने बताए ।
इनरुवा नगर क्षेत्रमा निर्वाचित पदाधिकारीहरुले जनता सेवामा बढी केन्द्रीत भएर काम गर्नुपर्ने नेता कोइरालाको भनाई छ । ‘सेवा गर्नु नै धर्म हो’ उनले भने, ‘ जनताको सेवा प्रवाहमा बढी ध्यान दिनुपर्छ ।’ नेपाली कांग्रेस इनरुवा नगर समितिले जनताको समस्यालाई मध्यनजर गर्दै जिल्ला प्रहरी, सुनसरी प्रशासन, मालपोत कार्यालय लगायतका निकायमा जनताको समस्यालाई पहिचान गरी समस्या समाधान गर्नका लागि नवनिर्वाचित पदाधिकारीहरुले भूमिका निर्वाह गर्नुपर्ने बताए ।
फरक प्रसंगमा नेता कोइरालाले नेपाली कांग्रेसको १५ औं महाधिवेशनमा इनरुवा नगर सभापति पदमा राजन मेहता उम्मेदवार नबन्ने घोषणा गरेका छन् । १५ औं महाधिवेशनका लागि नगर सभापति लगायत अन्य पदका लागि अहिलेदेखी नै तयारी थाल्न अनुरोध समेत गरेका छन् । १४ औं महाधिवेशनबाट इनरुवा नगरमा पराजित भएकाहरुलाई हरेश नखाई अगामी रणनीति तयार गरी १५ औं महाधिवेशनका लागि कसरत सुरु गर्न नेता कोइरालाले आग्रह समेत गरेका हुन् ।
इनरुवा नगरपालिका वडा नं २ स्थित रहेको नेपाली कांग्रेस जिल्ला पार्टी कार्यालयमा निर्वाचित पदाधिकारीहरुलाई प्रमाण–पत्र वितरण एव पदस्थापना साथै सम्मान कार्यक्रम सम्पन्न भएको हो । कार्यक्रममा १४ औं नगर अधिवेशनबाट निर्वाचित पदाधिकारीहरुलाई प्रमाण–पत्र सहित खादा लगाएर प्रदेश सांसद ज्योती सुब्बा, नेपाली कांग्रेसका जिल्ला सभापती राजीव कोईराला, नेका जिल्ला सचिव केदार भण्डारी, कोषाध्यक्ष पंकज महतो, ईनरुवा नगरपालिकाका नगर प्रमुख तथा इनरुवा नगर सभापति पदमा निर्वाचित राजन मेहताले समेत सम्मान गरेका थिए ।
नेपाली कांग्रेस १४ औं नगर अधिवेशनबाट नगर सभापती पदमा राजन मेहताले २ सय १९ मत ल्याएर विजय भएका थिए भने उपसभापती पदमा प्रदिप ढकाल २ सय ३२ र बिनिता दाहाल १ सय ८४ मत ल्याएर विजय भएका थिए । त्यसैगरी सचिव पदमा खेमराज थापा २ सय ८ र राकेश निरौला २ सय ५९ मत ल्याएर विजयी भएका थिए । त्यसैगरी सहसचिव पदमा शेखरनाथ पोखरेल र जय प्रसाद साह
निर्विरोध भएका थिए ।
नेपाली कांग्रेस इनरुवा नगर कार्यसमितिको सदस्यमा सबैभन्दा कम उमेरकी रिषिता साह निर्वाचित भएकी छिन । सो कार्यक्रममा इनरुवा नगरपालिकाको १० वटै वडाबाट ३÷३ जनाको दरले ३० जना निर्विरोध निर्वाचितहरुलाई समेत प्रमाण–
पत्र सहित खादा ओढाएर सम्मान गरिएको थियो ।
