इनरुवा । नेपाली कांग्रेसको १४ औं महाधिवेशनबाट इनरुवा नगरको उपसभापति पदमा निर्वाचित प्रदीप ढकालले नगर समितिमा युवाहरुको बर्चस्व कायम भएकोले काम गर्न सहज हुने बताएका छन् ।
कांग्रेसको १४ औं महाधिवेशन अन्र्तगत असोज ९ गते सम्पन्न इनरुवा नगर अधिवेशनबाट २ सय ३२ मत प्राप्त गरेर विजयी भएका उपसभापति ढकालले इनरुवा नगर कार्य समितिसँगै अन्य पालिकाहरुमा समेत युवाहरुको वर्चस्व कायम भएकोले अगामी दिनमा पार्टीको काम गर्न सहज हुने बताए ।
सुरसेर दैनिकसँगको कुराकानीमा उपसभापति ढकालले नेपाली कांग्रेस पार्टीको गतिविधिलाई प्रभावकारी ढङ्गबाट लैजाने बताए । आगामी निर्वाचनलाई लक्षित गर्दै ढकालले युवाहरुको सक्रियतामा जोस जागरका साथ पार्टीको लागि काम गर्ने बताए । पार्टीलाई बलियो बनाउनका लागि अहोरात्र खटने समेत उनले बताए ।
नेपाली कांग्रेसको भातृसंगठन नेपाल तरुण दलमा २०५४ सालमा इनरुवा नगर सदस्य भएर काम गरेका ढकाल सक्रिय भएर पार्टीलाई बलियो बनाउने कार्यमा चिन्तित छन् । पार्टीमा बफादार भएर संगठनलाई मजबुत बनाउने कार्यमा सदैव लागि परेकोले सबैको विश्वासको पात्र बन्न उनी सफल भएका छन् । कांग्रेसको १२ औं नगर अधिवेशनमा इनरुवा नगर सदस्य तथा नगर विकास समितिको सदस्य पदमा रहेर काम गरेकोले सो अनुभवलाई अगामी दिनमा कार्यान्वयन गर्ने प्रतिवद्धता उनको छ ।
ढकाल कांग्रेसको १३ औं महाधिवेशनमा इनरुवा–१ बाट क्षेत्र प्रतिनिधिमा निर्विरोध निर्वाचित भएसँगै इनरुवा नगर उपसभापति पदको जिम्मेवारी निर्वाह गरेका ढकालले कांग्रेसको १४ औं नगर अधिवेशनबाट अत्याधिक मत पाएर निर्वाचित भएपछि पार्टीको लागि दिनरात नभनी काम गर्ने बताए । ढकाल भन्छन्– नगरबासीले दिएको जिम्मेवारीलाई इमान्दारीताका साथ पुरा गर्छु । नगरबासीको अमुल्य मतलाई कतै ठेस नपुग्ने गरी सबैको शिरलाई उच्च पार्ने गरी नमुना कार्य गर्नेछु ।
ढकालले नगर अधिवेशनमा अमुल्य मत दिई बिजयी गराउनु हुने सबैलाई धन्यवाद ज्ञापन समेत गरे । सबैको सम्मान गर्दै पार्टीलाई मजबुत बनाउनका लागि सल्लाह सुझावलाई मध्यनजर गर्दै अगाडी बढ्ने उनको भनाई छ । नगरबासीको इच्छा र आंकक्षालाई पुरा गर्दै कसैको भरोसालाई नतोडने गरी पार्टीमा सबैलाई अटाउने गरी सम्मान अवसर प्रदान गर्नका लागि अहम भुमिका खेल्ने समेत उनको कथन छ ।
