इनरुवा । नेपाली कांग्रेस सुनसरीका सभापति एवं प्रदेश–१ का संसदीय दलका नेता राजीव कोइरालाले देवानगंज–४ कप्तानगंजको श्री श्री १०८ श्री नवदुर्गा भवानी मन्दिर निर्माणमा २५ लाख सहयोग गरेको बताएका छन् ।
देवानगंज–४ कप्तानगंजको नवदुर्गा भवानी मन्दिरको उद्घाटन कार्यक्रमका बिशिष्ट अतिथि समेत रहेका नेता कोइरालाले प्रदेश संसद कोषबाट मन्दिर निर्माणका लागि २५ लाख बजेट दिएको बताएका हुन् ।
सुनसरीको देवानगंज गाउँपालिकाका जनताको चाहना अनुरुप मन्दिर निर्माणका लागि २५ लाख सहयोग गरेको बताउँदै यस क्षेत्रलाई ठुलो धार्मिक स्थल र पर्यटकीय क्षेत्रको रुपमा विकास गर्न सहज हुने उद्देश्यले सहयोग गरेको बताए ।
नेता कोइरालाले देवानगंज गाउँपालिका–४ कप्तानगंज भारतीय सीमासँग जोडिएको वडा भएकोले भारतीय धार्मिक पर्यटकहरुलाई यस क्षेत्रमा भित्र्याउन सकिने हुदा यस क्षेत्रलाई पर्यटकीय क्षेत्रको रुपमा समेच विकास गर्न सकिने हुँदा यस क्षेत्रकै नमुना मन्दिर निर्माण गरेर बिभिन्न गतिविधिहरु गर्दै जानुपर्ने समेत बताए ।
फरक प्रसंगमा नेता कोइरालाले भारतीय सीमावर्ती क्षेत्र देवानगंज गाउँपालिका भएकाले भन्सार कार्यालयको स्थापना गरी सुचारु गर्नुपर्नेमा जोड दिए । भन्सार कार्यालय स्थापना गर्नका लागि आपूmहरुले पहल सुरु गरेको उनले बताए । यस क्षेत्रमा भन्सार कार्यालय सुचारु भएपछि सर्वसाधारणहरुलाई कामकाज गर्न सहज हुने र व्यापारी दृष्टिकोणले पनि विकास हुन थालेकोले भन्सार कार्यालय स्थापना हुन जरुरी रहेको उनले बताए ।
वर्तमान नेपाल सरकार र मित्र राष्ट्र भारत सरकारको समेत पहलमा भारतीय सीमावर्ती क्षेत्र कप्तानगंजमा भन्सार कार्यालय स्थापना गर्नका लागि सबैले आवाज उठाउन आवश्यक रहेको उनले बताए ।
देवानगंज गाउँपालिकाको कप्तानगंजमा भन्सार कार्यालय स्थापना गर्नका लागि वर्तमान सरकारले पहलकदमी भूमिका निर्वाह गर्नेमा विश्वस्त रहेको नेता कोइरालाको भनाई छ । हिन्दु धर्मावलम्वीहरुको महान चाडपर्व बिजया दशमीको अवसरमा शुभकामना समेत उनले व्यक्त गरे ।
