इनरुवा । सुनसरी सदरमुकाम इनरुवा सहित बिभिन्न ठाउँमा सर्वसाधारणहरुको चहलपहल बढन् थालेको पाइएको छ । बिजया दशमीको सुरुवात भएलगतै इनरुवा बजार लगायत बिभिन्न ठाउँको बजारमा सर्वसाधारणहरुको चहलपहल बढेपछि खसीबोकाको कारोवार बढेको छ ।
बजारमा लत्ता कपडादेखि लिएर खाद्यान्नसँगै खसि बोकाको कारोवारमा समेत बृद्धि भएको पाइएको छ । देशैभरका बजारमा अहिले दशैका लागि किनमेल गर्नेहरुको भिड बढ्न थालेको छ । सुनसरीमा पनि अवस्था अन्यत्रको जस्तै नै छ । सुनसरीका स्थानीय हाटबजारमा मानिसको चहल पहल बढिरहेको छ ।
दशैका लागि बिशेष गरि खसि बोका खरिद गर्नेहरुको भिड देखिन थालेको छ सुनसरीमा पनि । दशैमा देवि वा कालीलाई प्रसादको रुपमा चढाउन र घरमा मासु खानका लागि समेत खसीबोका खरिद गर्न आउनेको संख्या बढेको उद्योग वाणिज्य संघ इनरुवाका अध्यक्ष बिरेन्द्र साहले बताए । इनरुवामा लाग्ने बिहीबारे हाटमा मात्रै एक दिनमा ९ सय खसीबोका खरीदबिक्रि भएको स्थानीय ब्यापारीहरुले बताएका छन् ।
सुनसरी सहित सप्तरी र सिराहा तथा काठमाण्डौको समेत व्यपारीहरु यहा आउने भएकाले खसीबोकाको कारोबारमा वृद्धि भएको व्यपारीहरुले बताएका हुन् । बजारमा खसीबोकाको माग बढेपछि अवैध रुपमा भारतीय खसीबोका समेत ब्यापारीहरुले भित्र्याईरहेको स्थानीय मिथलेस झाको भनाई रहेको छ ।
भारतीय बजारमा नेपाली बजार भन्दा खसिबोका सस्तोमा पाउने भएकाले ब्यापारी तथा केहि तस्करहरुले सीमापारीको बजारबाट खसीबोकाहरु अवैध रुपमा ल्याउने गरेको गुनासो स्थानीय व्यपारीहरुको छ । बजारमा खसि बोकाको माग बढेपछि खसि बोकाको मूल्यपनि आकाशिएको छ । यसले उपभोक्तालाई समस्या भएको स्थानीयहरुको भनाइ रहेको छ । केही किसानहरुले भने भारतीय खसीबोका अवैध रुपमा भित्रिएका कारण आफूहरुले खसीबोकाको उचित मूल्य नपाएको गुनासो समेत गरेका छन् ।
दशैमा मात्रै सुनसरीका हाटबजारमा ७ करोड भन्दा बढीको खसिबोकाको कारोवार हुने गरेको उद्योग वाणिज्य संघ इनरुवाले जनाएको छ । सुनसरी सदरमुकाम इनरुवा सहित जिल्लाको विभिन्न ठाउमा लाग्ने हाटबजारमा ७ करोड भन्दा बढीको खसिवोकाको कारोवार हुने गरेको छ । सुनसरी सदरमुकाम इनरुवा, धरान, इटहरी, पश्चिमकुशाहा, मधुवन लगायतको ठाउँमा लाग्ने हाट बजारमा बढी मात्रामा खसीबोकाको कारोवार हुने गरेको बुझिएको छ ।
